Вержиста, 5 апрельста, Мордовиянь Оцюнясь примась участия химиять коряс школьниконь Всероссийскяй олимпиадать финальнай этапонц, кона етась Саранскяйса, торжественнай селгомасонза.
Олимпиадаса примасть участия школань тонафнихть странань 54 регионцта – Калининградста сявомок Приморскяй крайти молемс. Сембоц пцтай 250 участник, конатнень еткста кемголмувось – Мордовиянь представительхть.
«Мордовияса пуроптф оцю опыт тяфтама мероприятиятнень етафнеманкса. Несколька киза мельцек республиканьконди макссеви школьниконь олимпиадатнень финальнай этапснон етафнеманкса правась. Физикать, астрономиять, биологиять, физкультурать, мировой художественнай культурать, а тядде химиять коряс. Мялезе азомс благодарностень валхт тя возможностть инкса Российскяй Федерациянь Образованиянь и наукань министерствати, - азозе МР-нь Оцюнясь. – Башка спасибамань валхт – олимпиадань жюрити. Сонь составсонза оцю ученайхть, эсь тевонь лац содай профессионалхт. Оцю честь сембонди тейнек, што жюрить вятьсы сонць Ломоносовонь лемса Московскяй государственнай университетонь химическяй факультетонь деканць, Наукань российскяй Академиянь академиксь, химическяй наукань докторсь Валерий Васильевич Лунин».
Мекольдень кизотнень Мордовиясь странаса занцесы васенце вастть асу шабатнень ширеснон кирнеманц коряс. Школьникне сатнихть оцю сатфкст аф фкя лацонь интеллектуальнай олимпиадатень эса. Меля Всероссийскяй олимпиадать заключительнай этапсонза Мордовиянь школьниксь занясь 45 призовой васта. Тя омбоце результатсь странань сембе региоттнень еткста. Республикаса парста работай Асу шабанди лицейсь. Омбоце кизось мельцек сон занцесы омбоце вастть Россиянь инь цебярь 500 школатнень рейтингсост.
2015 кизоня лицеень воспитаниксь Иван Утешев арась историяса васенце россиянинкс, кона сяськсь астрономиять и астрофизикать коряс Мировой олимпиадаса. Сембоц кота кизоста сявф ни 130 лама медаль Международнай предметнай олимпиадатень эса. Эздост 45 медальсь - золотаннет. Результаттне сатневихть тяфтама приоритетнай ширетнень коряс кода математикась, физикась, химиясь, биологиясь.
«Содаса, што кажнайти эздонт тя кизось аф теждяль, но результатонь канниель. Тинь лама тонафнеде, аноклакшнесть эсь проектонтень, лац няфнесть прянтень олимпиадать региональнай туронзон пингста. И работанте ашезь ляда результатфтома, - мярьгсь Владимир Волков. – Фталу лядсть пялькстоматне, несколька теоретическяй и эксперементальнай тур. Сембось тя – тинь васенце аськолксонте оцю текшненди. Олимпиадаса сяськомась панчси инголент ки странань инь цебярь тонафнемань центратнень эса содамошинь пуропнеманкса. Тернетядязь – тяда ащекшне стак! Тонафнеда, касондода-вииякшнеда!»
Мордовиянь Оцюнять эзда лятфнембяленди казнет казьфтольхть жюринь члеттненди, а стане жа школьникненди и синь тонафтыснонды, конатнень шачема шисна ульсь турнирть етафтома пингста.
Олимпиадать итогонзон коряс сяськихнень еткс сувасть Асу шабанди Республиканскяй лицеень тонафнихне – 10 классонь тонафнись Анастасия Адайкина и 9 классонь тонафнись Алексей Шишкин. Призерхнень етксот – 10 классонь тонафнихне Денис Майданов, Анастасия Дектярева, Евгения Ярославцева, 11 классонь тонафнихне Александр Матвеев, Мария Сайгина, Данила Федотов.