13 апрельста Саранскяйса етась Приволжскяй федеральнай округонь РФ-нь субъекттнень государственнай властень законодательнай органцнонь Ассоциацияснон заседанияц. Ассоциациять работаса примасть участия ПФО-са РФ-нь Президентть полномочнай представителец Игорь Комаров, Мордовиянь Оцюнять аф лама пингс тевонзон тиендисна Артём Здунов, округонь региоттнень законодательнай органцнон вятисна, властень исполнительнай оргаттнень представительсна.
Заседаниять пингста корхтамась мольфтевсь коронавируснай инфекциять келемоманцты кить персеманц, трудть производительностенц касфнеманц коряс мероприятиятнень нормативнай правовой регулированияснон цебярьгофнеманц колга, тяконь лувксса тя сфераса государствать ширде ширень кирдемань мератнень эряфс етафтомаснон квалма, ванфтольхть и лия кизефкст.
Заседаниять панжемста, Игорь Комаров азозе, што коронавируснай инфекциять каршес тюремста сашендови решандакшнемс аф кржа од прябала, конат водендафт ломаттнень и бизнесть араламанкса. Полпредсь стане жа китькстазе, што етай кизоть пенц коряс коронавируснай инфекциять келемоманц коряс ситуациясь округонь региоттнень эса сяда цебярьгодсь, но лафчемкшнемс мзярс аш кода. Эряви сяда товга шарфнемс башка мяль тяфтама ширетненди, кода эпидемиологическяй ситуациять мяльса кирдезь башка ограничениятнень лоткафтомасна, коечнай фондть работань штатнай режимс этапонь этап етафтомац, коронавирусть лангс тестированиять ванфтомац, ковидса сярядихнень лекарстваса обеспечендамасна.
«Тяниень пингть башка оцю мяль шарфтома вакцинацияти. Целайнек округса вакцинациять коряс показательхне аньцек аф ламода сяда емлат Россиять эзга средняй показательхнень коряс. Государствань Оцюнясь аф весть китькснезе, што эряви сядонга виияфнемс вакцинациять, штоба эвондафтомс урмать каршес коллективнай иммунитет», - мярьгсь Игорь Комаров.
«Ключевой кизефкссь тячи – коронавируснай инфекциять каршес ащемась и сембось, мезсь сотнеф тянь мархта. Лафчепнемс противоэпидемическяй мератнень тяниень пингть улель оцю эльбятьксокс. А вов кода и мзярда эряви тянь тиемс, полафтомс тя кизефксть коряс опытса – Ассоциациять коряс сяда цебярь площадка аф муят», - мярьгсь Мордовиянь Оцюнять аф лама пингс тевонзон тиендисна Артём Здунов. Отвечамок журналисттнень кизефксснон лангс, республикань вятись тя темать коряс корхтамать поладомста азозе: «Коронавируснай инфекциять келемоманц мельге ситуациясь най кирдема контроль ала. Мон эрь недяляня етафнеса коронавируснай инфекциять профилактиканц и келемоманц каршес ащемать коряс оперативнай штабть сембе специалисттнень и муниципальнай образованиянь оцюнятнень мархта. Сембода главнайсь – эстокиге пачфтемс вакцинать, кона сашенды федеральнай центраста, райоттненди и прививочнай пункттненди. Миньцонк 42 прививочнай пункт и 17 мобильнай пункт – синь стане жа пяк лезнихть. Лезнихть волонтерхне – пцтай 100 медицинскяй доброволецсь участвондайхть вакцинацияса. И, конешна, важна разъяснительнай работась, штоба сембе шарьхкотькшнелезь: эряви тиемс прививкат населениять 60 процентонцты – тя безопасностень уровень сембе обществати».
«Мордовияти главнай задачакс тя пингть ульсь народть ванфтомац и, конешна, аф нолдамс экономикать лафчемоманц. Лама тифоль, оперативнайста работась региональнай оперштабсь, решандакшневсть медицинскяй лезксонь кизефксне. Кода няфтезе тячиень корхтамась, прябалатне региоттнень эса шарфтсть фкя-фкянди, но пцтай сембонди удалась сяськомс синь», - мярьгсь Мордовия Республикань Государственнай Собраниять Председателец Владимир Чибиркин.
Шинь повесткань омбоце кизефксть коряс Игорь Комаров мярьгсь, што главнай задачась – технологическяй развитиять виияфнемац и трудть производительностенц касфнемац. Тяддеть ушетксста целайнек округса участвондась 815 средняй и оцю предприятия, конат канневихть экономикань базовай аф сырьевой отраслятненди. Тя нилецекс пялькста сяда лама арьсефть коряс. Полпредсь китькстазе, што трудть производительностенц касфнеманц коряс нацпроектть эряфс етафтомац – важнай шире, конань рамкаса эряви мольфтемс корхтама региональнай практикатнень колга, тяконь лувксса Татарстанонь, Нижегородскяй областень, Пермскяй краень. Решандамс трудть производительностенц коряс задачать ули кода аньцек бизнесть и научно-техническяй сатфксснень кооперацияснон вельде. «Трудть производительностенц касфнемац максы цебярьгофтомс ломаттнень эряфснон, мезсь ащи инголенк главнай целькс», - мярьгсь полпредсь. Нацпроектть сяда товолдонь виияфнеманкса, Игорь Комаровонь валонзон коряс, эряви сбалансированнай законодательнай обеспечения. Доклад мархта темас коре стане жа выступандась Татарстан Республикань Государственнай Советть председателец Фарид Мухаметшин: «Эстейнек минь пуроптоме несколька магистральнай направления, конатнень еткса бережливай производствась, производственнай процесснень и трудендамань условиятнень оптимизациясна. Миньцонк етафтовихть ни эряфс несколька программа и проект, конат водендафт трудть производительностенц касфнеманц вишкоптоманкса. Трудть производительностенц касфнеманц коряс задачась ащи васенцекс 2030 кизоть самс Стратегиять эса, кона примаф республикаса».
Корхтамок цифровой трансформациять колга, Игорь Комаров отмечазе округса цифровой инфраструктурать оцю уровененц: «Интернетти» широкополоснай доступоц ули семьятнень 72 процентснон, населениять 81 процентоц нолясы тевс электроннай формаса государственнай и муниципальнай услугатнень получамаснон. Полномочнай представительсь лятфтазе, што сявондемок мяльс РФ-нь Президентть Владимир Путинонь поручениянц сембе субъекттнень эса должетт улемс кемокстафт экономикань, социальнай сферань и госуправлениянь ключевой отраслятнень цифровизацияснон стратегиясна. «Округонь региоттнень эса улихть наработкат, конат достойнайхть улемс содафокс и нолдафокс тевс марнек странаса», - азозе полпредсь. Татарстан Республикаса цифровой трансформациянь опытть колга азондсь государственнай управлениянь цифровой развитиянь, информационнай технологиянь и связень министрсь Айрат Хайруллин. «Тячи минь етатама искусственнай интеллектти. Кда информатизациять пингста цебярьгофневи производствась, но тефнень вятемасна ванфневи, эста цифровой трансформациять пингста полафни клиентть и услугань пачфнить еткса взаимодействиянь механизмась и принципсь, нльне эста, кда корхтамась мольфтеви государствать колга», - китькстазе сон.
Заседаниять пингста азф инициативатне прважавихть Государственнай Думав и РФ-нь Правительствати.
Заседаниять рамкаса Мордовиянь Государственнай Собраниясь кемокстась сотрудничендамать колга Соглашеният Пермскяй краень Законодательнай Собраниять и Оренбургскяй областень Законодательнай Собраниять мархта.