2 декабрьста Мордовияв рабочай поездканц пингста Россиянь здравоохранениянь министрсь Вероника Скворцова ульсь ламоц медицинскяй учреждениятнень эса – Региональнай сосудистай центраса, республиканскяй клиническяй больницяса, Перинатальнай центраса, 3№ идень поликлиникаса.
Республиканскяй клиническяй больницяса министрсь макссь оцю оценка лечебно-диагностическяй корпусть справочнай отделениянцты. Кардиохирургиянь, нейрохирургиянь, травмотологиянь операционнай блокнень, а стане жа анестезиологиянь и рентгенологиянь отделениятнень ваномста отмечафоль тяса макссеви услугатнень, конат отвечайхть тячиень вешфксненди, оцю уровеньцна. Вероника Скворцова ульсь телемедицинань сеансса – Республиканскяй клиническяй больницянь специалисттне консультировандазь Торбеевскяй межрайоннай больницяста работай ялгаснон. Министрсь азсь мяль етафнемс тя сеанснень фалу, отмечамок, што Мордовияса тифт эсь лацонь условият тя перспективнай направлениять виияфнеманкса.
Тяда меле Россиянь здравоохранениянь министрсь Вероника Скворцова ульсь 3№ идень поликлиникаса, кона панчфоль 2014 кизоня и тяниень пингть примси 18 тежянь шаба ошень Пролетарскяй районцта. Специализированнай медицинскяй лезкссь тяса макссеви 26 направленияс коре.
Вероника Скворцова кизефнесь, кода ладяф работась поликлиникать регистратураса, кода вятеви сярядихнень приемс тяштемасна инфоматть и интернетть вельде. Министрсь ванозе неотложнай лезксонь кабинетть, бассейнать, бесконтактнай гидромассажнай ваннань кабинетть. Инжихне стане жа ванозь восстановительнай пчксемань отделениять, коса реабилитация етнихть шабатне Мордовиянь сембе райоттнень эзда, конатнень улихть хроническяй урмасна, тяка лувкссот ДЦП-сь и двигательнай нарушениятне. 2016 кизонь 9 ковста поликлиникаса медицинскяй лезкс получась шумбрашинь ограниченнай возможность мархта 6336 шабась, 120 идсь еткстост инвалидт.
Участковай врачсь-педиатрсь Ирина Проскурина няфтезе, кода вятевихть электроннай амбулаторнай картатне. Сембоц поликлиникаса кафта педиотрическяй отделеният, конатнень составса 22 участка.
Мордовскяй республиканскяй клиническяй перинатальнай центраса ульсь васедема медицинскяй общественностть мархта. Эсь выступлениясонза республикань Оцюнясь Владимир Волков пачфтсь ся тефнень колга, конат тиендевихть Мордовияса здравоохранениянь колма уровенень системать пуроптоманкса. «Оцю мяль минь шарфнетяма межрайоннай медицинскяй центратнень работаснонды, шинь стационару сярядихнень пачфнеманкса рамафт цебярь микроавтобуст. Высшай уровенень медицинась стане жа фалу одкстопневи, ламось сатф, но минь аш мяленьке лотксемс тянь лангс, тефне тянь коряс кармайхть мольфтевома сяда товга. Отраслять виияфнемаса оцю васта макссеви здравоохранениянь работникненди лезнемати, тя - участковай врачненди, педиаторхненди, терапефттненди, общай практикань врачненди, лия специалисттненди «подъемнаень» пандомась. Тяда башка, Мордовиянь медикне сидеста етнихть стажировка тяниень пингонь российскяй и омба масторонь центратнень эса.
Минь аф ужяльдьсаськ средстватнень сянкса, штоба Мордовияса улельхть инь грамотнай и квалифицированнай врачт, - башка китькстазе Владимир Волков. – И минь задачаньке сянь эса, штоба республикань медицинскяй центратне аральхть межрегиональнайкс».
Вероника Скворцова выступлениясонза азозень эсь мялензон-арьсеманзон республиканьконь колга, вдь Мордовияса сон ульсь васенцеда. Министрсь отмечазе, што тя поездкась пяк козя и лездсь няемс-содамс ся инголи аськолкснень, конат тифт республикань здравоохраненияса мекольдень кизотнень. РФ-нь Минздравонь вятись макссь оцю оценка «Биохимик» ПАО-ть видеса фармакологическяй од производствать панжеманцты. Сонь валонзон коряс, эсь лацонь фармацефтическяй Научно-производственнай центрась марса региононь инь оцю вузть мархта лездыхть эреклафтомс Мордовияса высококласснай антибиотиконь производствать коряс советскяй опытть.
«Минь ваноськ региональнай сосудистай центрать работанц, сонь сотксонц первичнай сосудистай отделениятнень мархта. Тя фкя марстонь сеть, шинек-венек вятевихть консультацият, работась ладяф пяк лац. И улихть ни результат – нюрьхкяня пингста Мордовияти удалась сатомс ишемическяй и геморрагическяй инсульттнень пингста инь цебярь результатть аф аньцек Россияса, но и сембе мирса», - отмечазе Вероника Скворцова.
Россиянь здравоохранениянь министрсь азсь благодарностень валхт Мордовиянь медицинскяй общественностти цебярь работанкса и поздравляндазе сатфксонзон мархта.
«Благодарностень башка валх азан Владимир Дмитриевич Волковонди. Республикань Оцюнясь лична участвондай эрь мероприятиять эса, работай здравоохранениянь эрь проектть лангса. Сон пяк лац шарьхкоди и тяниень пингонь технологиятнень, и информатизациянь процессть, и фкя инь стака медицинскяй комплекснень строямаснон эсь лацонь ширензон эса. Региононь вятить и сонь команданц тевти тяфта малаткшнемасна максси оцю надиямат Мордовиянь здравоохранениять сяда товолдонь вииякшнеманцты», - отмечазе Вероника Скворцова.
Васедемать шумордамста РФ-нь здравоохранениянь министрсь и Мордовиянь Оцюнясь казезь инь цебярь терапефттнень, конат сувасть «Россиянь терапефттнень рейтингс». Медикне получазь Мордовия Республикань Оцюнять Благодарностенц и «Лучший терапевт ТОП 500» Почетнай диплопнень.
Журналисттнень кизефксснон лангс отвечамста Вероника Скворцова отмечазе:
«Васендакиге, пцтай строяф тяфта лемдеви здравоохранениянь колма уровенень системась. Васенце пялькссь кемокстаф, аф селкф фкявок ФАП, меколанк, строяф 43 од, конатнень эса ули сембе эрявикссь. Тяниень пингть республикань эряйхнень, тяка лувксса райоттнень и велетнень эса, ули возможностьсна получамс сембе эрявикс медицинскяй лезксть. Цебярьгофтф и козякофтф од машинаса «скорай помощсь». Тиф тя кода федеральнай, стане и региональнай бюджетонь средстватнень лангс. Тя максси возможность курокста пачфтемс сярядить эрявикс медицинскяй учрежденияв.
Вииякшни информатизациясь, сяда тов мольфтеви медицинати цифровой технологиятнень сувафнемасна. Эряви отмечамс, што Мордовияса тячи ни сембе медицинскяй организациятне подключандафт оцю скоростень интернетти, тевс сувафневихть электроннай документооборотсь, врачти приемс тяштемань электроннай записсь, телемедицинань метоттне. Ня сатфксне кадондсазь эсь пильгокиснон демографияти – тядянь кулсематне республикаса – 0, атнайнятнень еткса кулсематне – 4,8 тежянь эрекста шачфнень лангс, кирсть кулсематне оцю населениять еткса».
Мордовия Республикань Оцюнясь Владимир Волков:
»Тячи улихть сембе условиятне сянкса, штоба оцю технологиянь лезксть Мордовиянь медицинскяй центратнень эса получселезь аф аньцек республикань эряйхне, но и лия региононнетне. Тяфтама задача путнихть инголенк Россиянь Президентсь и Здравоохранениянь министерствась.
Мялезе азомс оцю спасиба Вероника Игоревнанди и сембе командати, кона сась Мордовияв, кизефксоньконь и прябаланьконь лангс мялень шарфнеманкса. Минь ваноськ пцтай сембе задачатнень, конат эрявихть решандамс Мордовиянь медицинскяй обслуживаниять цебярьгофтоманкса, тейнек ули мезень лангса марса работамс и минь надиятама Россиянь Минздравть сяда товолдонь лезксонц лангс».