15 декабрьста Саранскяйса торжественнайста панчфоль «АШАН» компаниянь «Наша Радуга» гипермаркетсь. Тяка шиня Владимир Волков васетькшнесь «Гипермаркеты Ашан Ритейл Россия» направлениять генеральнай директоронц Олег Альхамовонь мархта.
Содаф торговай сетень представительсь азондсь региононь Оцюняти эряфс етафтф проектть колга: «Наша Радуга» гипермаркетсь Саранскяйса арась юбилейнайкс, Россияса тяфтама форматонь кемоньце торговай комплекссь, конань инвестициянзон объемсна пачкодсь 400 миллион цалковайс, а площаденза – 3 тежятть квадратнай метрада лама. Ассортиментсонза лувондови 13 800 аф фкя лацонь товар, конатнень эзда 6 500-сь – продовольственнай товархт и 7 300-сь – аф продовольственнайхть». Олег Альхамов стане жа отмечазе, што од гипермаркетса улихть ни республикань производительхнень, конатнень еткса «Ламзурь» ОАО-сь, Чамзинскяй птицефабрикась, Ичалки ТД-сь, «МПК «Атяшевский» ООО-сь, товарсна, тяка пингть переговорхне республикань поставщикнень мархта мольфтевихть сяда тов.
Башка отмечафоль од магазинть инновационнай ширец. Тевсь сянь эса, што кассань сембе линиясь оборудовандаф самостоятельнай пандомань системаса, коза сувсихть сканированиянь 12 станция и пандомань 14 терминал. Тяфтама системась максси возможность примамс шиньботмоста сяда лама ломань и кирьфтамс очереттнень.
Владимир Волков китькстазе, што республикань потребительскяй рынкаса содаф маркань гипермаркетть эвондамац - тя цебярь динамика регионть экономиканцты, бизнесть виияфнеманкса и од рабочай вастонь панжеманкса. «Эрявикс, штоба эсь работасонт тинь сявонделесть мяльс минь производителеньконь возможностьснон, тяка лувкссот фермарскяй хозяйстватне. Лувондса, што питаниянь мордовскяй продуктатнень качествасна и ассортименцна достойнай мумс васта «АШАН» брендонь магазиттнень полкаснон лангса, - мярьгсь Мордовиянь Оцюнясь. – Тяда башка, кой-кона продукциять коряс – алхнень, нармонень сивольть, лофцонь продукциять, кондитерскяй изделиятнень – мордовскяй производительхне пяшкоделезь лия регионца работай «АШАН» гипрмаркеттнень вешфксснон». Мордовиянь Оцюнясь азсь мяль сувафтомс полафткст Саранскяень «АШАН-ть» дизайнц, мазоптомок фасаттнень мокшэрзянь орнаментса: «Штоба Саранскяйса улель мокшэрзянь «АШАН» - содавикс и эсь лацонне!».
Стане жа васедемать пингста Саранскяйса «АШАН» гипермаркеттнень строямаснон коряс сяда товолдонь сотрудничествать колга. Ванфоль, коса синь сяда пара строямс, тяка лувксса – эрямань од микрорайоттнень эса, конат строявихть республикать столицаса 2018 кизонь футболть коряс миронь чемпионатти анокламать рамкаса.
Мордовия Республикань Оцюнять Пресс-службац