Мордовия Республикать эзда «Лидеры России» Всероссийскяй конкурсонь организаторхнень мархта регистрациять аделамста серматфоль 645 заявка. Формальнай процедуратнень тиемда меле: анкетань пяшкодемда, паспортнай даннайхнень тяштемда и видеоинтервьють сермадомда меле – конкурсса лядсь республикань 277 участник, тя 2 процентт Приволжскяй федеральнай округонь конкурсанттнень марстонь лувксснон эзда.
Сембоц ПФО-ть эзга регистрировандафоль 31 924 заявка, эздост примасть участия тестированияса – ПФО-нь 14 264 эряйсь. Тестированиянь етайхнень лувксснон коряс ПФО-са васенце вастс лиссь Нижегородскяй областсь – 2 415 ломань (17 процент). Омбоце вастть занцесы Самарскяй областсь – 2 073 заявка (15 процент). Колмоцекс арась Татарстан Республикась – 1 903 ломань или 13 процент.
Конкурсс заявкатнень примамасна ушетфоль 11 октябрьста и аделавсь 6 ноябрьста. Кочкафоль 199 тежяньда лама заявка. 9 ноябрть самс участникне анкетировандазь личнай кабинетснон и сувафтозь видеоинтервьюснон.
Дистанционнай отборонь этапсь поладови 10 ноябрьста сявомок 22 ноябрти молемс, мзярда азовихть результаттне. 10 ноябрьста участникне етасть тест содамошиснон лангс. 12 ноябрьста ульсть кафта тест – числовой и вербальнай маштомошитнень лангс. Конкуренциясь участникнень еткса пяк оцю, заданиятне вешихть внимательнайкс улема, отечественнай историять и географиять коряс содамошит. Дистанционнай отборть колмоце этапонцты, коса ванови управленческяй потенциалсь, нолдавихть сят, кие няфти инь цебярь результат васенце и омбоце этапнень коряс.
Сят, кит лац етасазь марнек дистанционнай отборть, получайхть тердема очнай региональнай полуфиналхнень эса участвондаманди. Приволжскяй
федеральнай округть эзга полуфиналсь етай Нижняй Новгородса 15-18 декабрьста. Конкурсть финалоц кармай Москуса 2018 кизоть ушетксста.
«Россиянь лидерхне» - тя панжада конкурс од поколениянь руководительхненди. Конкурсть етафнесы РФ-нь Президентть видеса государственнай службать и странать кадровай резерванц кизефкснень коряс Комиссиясь. Конкурсть оператороц – Народнай хозяйствань и государственнай службань Российскяй академиясь.