Мордовиянь Оцюнясь Владимир Волков 10 июньцта примась участия ПФО-са РФ-нь Президентть полномочнай представителенц Игорь Комаровонь округонь региоттнень оцюняснон, исполнительнай властень федеральнай органонь территориальнай органонь вятихнень, региональнай изберкомонь председательхнень мархта видеоконференциясонза, конань пингста корхтафоль Российскяй Федерациянь Конституцияти полафтксонь сувафтомать коряс Общероссийскяй вайгялень максомати анокламать колга.
Полномочнай представительсь азозе, што фкя инь васенце задачась властень сембе оргаттненди – обеспечендамс вайгялень максомать пингста ломаттнень шумбрашиснон безопасностьснон. Избирательнай комиссиянь сембе члеттне должетт улемс обеспечендафт араламань средстваса; вайгялень максомань помещениятнень должетт улемс бесконтактнай термометрат, антибактериальнай коврикт и антисептикт. Вайгялень максомань участкатнень эса пяшкотькшнемат санитарнай службатнень сембе вешфксснон.
«Россиянь Президентсь Владимир Владимирович Путин башка китькстазе, што вайгялень максомась должен етамс безопаснай условияса. Эряви тиемс сембось, штоба эрь ломанти улель кода сетьмоста кочкамс сянь, мезе мялемс странаньконь сай пингсонза», - мярьгсь Игорь Комаров.
Совещаниянь участникне стане жа мольфтсть корхтама вайгялень максомать пингста правопорядкать ванфнеманц колга. Полпредсь кошардозень силовой ведомстватнень обеспечендамс ломаттнень безопасностьснон. Игорь Комаров китькстазе, што кочкаматне етафтомат законодательствать мяльса кирнезь.
Башка корхтафоль Конституцияти сувафтомс азф полафткснень колга ломаттненди пачфнемать квалма. Лятфтасаськ, што общероссийскяй голосованиясь етафтови марнек странать келес, а стане жа эздонза ширеса, кирдемок мяльса Порядкать, конань кемокстазе Россиянь ЦИК-сь. Вайгялень максомась етафтови 2020 кизонь 1 июльста 8.00 – 20.00 частса. Ломаттненди, конатненди аф ули кода самс вайгялень максомань участкатненди, арьсефт лия возможностть:
максомс вайгяльснон тяда инголе;
максомс вайгяльснон улема вастсост («мобильный избиратель»);
максомс вайгяльснон аф вайгялень максомань помещенияса.