Россиянь Правительствать Председателец Дмитрий Медведев кемокстазе постановлениять Рузаевкаса опережающай развитиянь территориять панжеманц колга.
«Мезсь башка важна тя случайста, тя аф Дальняй Востоксь, а Мордовиясь, Удмуртиясь, Ярославскяй и Саратовскяй областтне. Тя максы возможность маластонь кизотнень панжемс ниле региоттнень эса пцтай 6 тежятть рабочай васта, кирьфтамс градообразующай предприятиятнень эзда тя
территориятнень ащемаснон и целайнек цебярьгофтомс тоса эрямань условиятнень», - китькстазе Дмитрий Медведев.
«Рузаевкаса опережающай развитиянь территориять панжемац лезды водендамс тяза инвесторхнень, панжемс од рабочай вастт, виияфнемс емла и средняй предпринимательствать, касфтомс налоговай базать», - мярьгсь Мордовиянь Оцюнясь Владимир Волков.
Арьсекшневи панжемс 1350 рабочай васта, водендамс 2,5 миллиард цалковаень лувксса инвестиция и получамс дополнительнай дохотт сембе уровенень бюджеттненди 630 миллион цалковаень лувксса.
Кемокстаф соглашениятнень рамкса «Рузаевка» ТОСЭР-ть территорияса арьсекшневи панжемс корпуснай и мягкай мебелень производства, панжемс производства машина китненди пластмасаста изделиянь производствать коряс, панжемс предприятия велень хозяйствань животнайхненди кормонди добавкань производствать коряс, келептемс пластиковай трубань производствать, строямс предприятия алонь продуктань производствать коряс и лама лия од производства.
Мордовия Республикань Оцюнять пресс-службац