Мордовиянь Прявтонь тевтнень топавтыцясь Артём Здунов таштамковонь 14-це чистэ ютавтсь важодемань промкс «Безопасные и качественные автомобильные дороги» нацпроектэнть топавтомань кевкстематнень коряс. Тосо ульнесь «Москва - Нижний Новгород» Упрдоронь ФКУ-нь прявтось Сергей Карпов.
Мордовиянь Прявтонь тевтнень топавтыцясь тешкстызе «Безопасные и качественные дороги» нацпроектэнть лувсо объекттнэнь шкастост максомань эрявиксчинть – явовить покш ярмакт: тедеде весемезэ явозь 5 млрд ламо целковойть, сынст эйстэ 2 млрд ламо целковойть - федеральной бюджетстэ.
«Москва - Нижний Новгород» Упрдоронь ФКУ-нь прявтось тешкстызе, те иень умарьковсто Россиянь Президентэнть Владимир Путинэнь кармавтоманзо коряс республикантень явозь 500 млн целковойть РФ-нь Правительствань Резервань фондстонть региононь, межмуниципальной ды местной китнень витнемс.
"Важодемась топавтозь эрязасто - неень шкане 90% контракттнэ уш тешкстазь, - мерсь Сергей Карпов. - Арасть кавтолдомат, весемесь теезь парсте. Ней ванновт ало - топавтомась".
Кода пачтясь республикань Строительствань, транспортонь ды китнень хозяйствань министрань тевтнень топавтыцясь Виктор Цыганов, «Безопасные и качественные дороги» нацпроектэнть лувсо тедеде арсеви витнемс региононь сетень 51 объект, вейсэнь кувалмосо 223 вайгельбеть, истя жо Саранск ошонь агломерациянь местной китнень лангсо 24 объектт, вейсэнь кувалмосо 14,8 вайгельбеть. Теде башка, нацпроектэнть лувсо поладови 3 покш объекттнэнь топавтомась: Рузаевкань перька кинь 1 этапонть максомась, Рузаевкань перька кинь 2 этапонть строямонь поладомась, Строительной курованть Гожувской куронть видьс кинть строямонь поладомась.
Мордовиянь Прявтонь тевтнень топавтыцясь сялдызе подрядной организациянть неть объекттнэсэ строямонь сроктнень а топавтоманть кисэ.
"Тынь эзинк топавто минек икеле обязательстватнень, улить тандавкст а ютавтомс явозь ярмактнень. Подрядчиктнень марто, конат а топавтыть государственной контракттнэнь, карматано сеземе важодемань сюлмотнень! Тесэ кодаткак кевкстемат иляст уле - курок ожоков, седе тов теле сы", - мерсь Артём Здунов.
Промкссонть истя жо кортасть регионсонть федеральной китнень виевгавтомадост.
Мордовия Республикань Прявтонь пресс-службась