Мордовиянь Оцюнять мзярошка пингс тевонзон тиендисна Артем Здунов 25 ноябрьста видеосвязень режимса етафтозе республикать территорияса коронавируснай инфекциять профилактиканц и келемоманц мельге контрольть коряс оперативнай штабть заседаниянц. Заседанияса примасть участия Правительствань члеттне, властень федеральнай органонь территориальнай оргаттнень вятисна, райононь оцюнятне.
«Етай штабть пингста путфоль несколька важнай задача, - лятфтазе Мордовиянь Оцюнять мзярошка пингс тевонзон тиендисна, - эняльдян тячи шарфтомс лангозост башка оцю мяль. Тя лекарственнай средстватнень кода государственнай, стане и частнай аптекатнень эса, а стане жа госпитальнай и амбулаторнай звенаса улемасна. Мялезе кулемс информация сянь колга, кода обеспечендакшневихть медработниконьке федеральнай и республиканскяй выплататнень мархта. И, конешна, кода сотцеви, медицинскяй лезкссь, мзяра пинге сашендови учендомс сонь. Сембе информациясь, кона сашенды тейнек эряйхнень эзда, эряви сявондемс мяльс и эстокиге примсемс корязост эрявикс решеният – тя ащи васенце вастса работасонк!»
Заседаниять пингста кулхцонтфтольхть региональнай Минздравонь и Роспотребнадзоронь представительхне, конат азозь, што тячиень шити ковиднай госпитальхнень эса уликс 2500 койка-васттнень заняф 82,5 процентсна. Кода азозе Мордовиянь здравоохранениянь министрсь Олег Маркин, стане жа аноклаф сембе эрявикссь, штоба ушедомс 100 койка-вастонди госпитальть работанц: «Кда пяденцяти эрявксты, минь ушедсаськ тя койка-васттнень панчсемаснон».
Башка оцю мяль штабть пингста шарфтфоль сянди, штоба коронавируснай инфекцияса сярядихне эсь пингстонза получселхть медицинскяй лезкс. Амбулаторнайста пчксеманкса региононь эряйхне эрявихть обеспечендамс лекарстваса, синь должетт улемс доступнайхть. «Тиема стане, штоба ломаттненди афоль сашендов ласькондемс фкя аптекаста омбоцети лекарствань вешендемста.». – мярьгсь Артем Здунов. И макссь поручения Правительствати етафтомс работа Мордовияса уликс инь оцю коммерческяй аптечнай сетьтнень представительснон мархта.
Сянь коряс, што социальнай сетьтнень эса и МР-нь Оцюнять «пси линиязонза» сашендыхть пеняцямат сянь лангс, што ломаттне несколька частонь, а кой-коста и несколька шинь учендыхть медицинскяй лезкс, Артем Здунов мярьгсь: «Кда ломанць 9-10 част аф получай лезкс, кда аш возможность тяниень пингть молемс ширезонза (минь содасаськ, што врачне аф сатнихть), эста вдь ули кода хуш отвечамс теенза! Гайфтемс, кулхцондомс, азомс, кода улемс, мезе тиемс врачть самс и мзярда сай медицинскяй работниксь – тя нормальнай социальнай практика. Ломанць должен шарьхкотькшнемс, мзярда теенза сай лезкссь, и содамс, што колганза ашесть юкста!»
Мордовия Республикань Оцюнять пресс-службац