15 декабрьста Саранскяйса федеральнай предметнай олимпиадань школьникненди-сяськихненди и «Оцю перемена» марнек Россиянь конкурсонь призёрхненди ётафтфоль Россиянь «Знание» обществать лекцияц-экскурсияц.
Региононь вятись азондсь Саранскяйть историянц колга, а стане жа сонь памятниконзон квалма, конатнень ёмлалгофтф копиясна няфтьфт краеведениянь республиканскяй музейса. Тяда башка, Артём Здунов азондсь патриархть Никононь и аф сяськф адмиралть Ушаковонь, Николай Огарёвонь и Степан Эрьзянь колга.
Музеень экспозициятнень оцюшка пялькссна лемтьфт Великай Отечественнай войнати. Ветераттнень личнай паршисна, эсь лацонь фотографиясна — сембось ванфтови мзярошка залса.
Тяка пингть экспонаттне, конат лемтьфт 326-це Рославльскяй стрелковай дивизиять боевой кинцты, выставкаса ащихть башка вастса.
«Аф официальнайста сонь лемнесазь «мордовскяй дивизиякс», сон пцтай марнек ащесь минь солдатоньконь эзда. Недяляда тяда инголе тейнек ванфтоманкса максфоль эсь лацонь боевой знамя. Тейнек тя афкуксонь святыня. Тя знамять ала мольфтевсь Ленинградть араламац, Москуть и Смоленскяйть ала тюремати. Тя минь атяньке и сире атяньке эсь эряфснон апак ужялек сатозь сяськомать и макссть тейнек эрямс воляшинь масторса. Мяляфтость, эсонк шуди сяськиень вер. И тейнек эряви тиемс семботь, штоба ванфтомс колгаст мялямть», - азондсь Артём Здунов.
Экускурсияда меле шабатне ульсть Рузаевкаса. Куйбышевскяй машина кинь оцюнясь Вячеслав Дмитриев азондсь РЖД-ть сатфксонзон и сай пингонди отраслять планонзон квалма.
«Оцю перемена» конкурсонь сяськись Анна Кузьмина, кона сась Рязаньцта, азозе, што пцтай мезевок ашезь сода Мордовиять колга, но тяни шарьхкодезе, што тя мялень салай регион, сонь эсь лацонне культурац.
Кафта шиньберьф шабатне стане жа улихть национальнай заповедникса, розатнень касфнемаснон коряс странаса инь оцю теплицаса, Н.П.Огарёвонь лемса МГУ-са, С.Д.Эрьзянь лемса изобразительнай искусствань музейса, а стане жа промышленнай кой-кона производстватнень эса.
Мордовиянь Оцюнять и «Монь Мордовиязе» кадрань конкурсонь финалисттнень ширень кирдемаснон пингста «Знание» обществать съёмочнай группац аноклай регионть колга просветительскяй фильма.
Мордовия Республикань Оцюнять пресс-службац