21 апрельста Республикань Кудса ётась экономикать ширенц кирдеманц и кемокс улеманц коряс антикризиснай штабть очередной заседанияц. Мордовиянь Оцюнясь Артём Здунов министронь кабинетть членонзон мархта ванозе кода молихть тефне основной отраслятнень эса. Регионть руководителец лятфтазе, што 18 апрельста Россиянь Президентсь ётафтсь экономическяй кизефкснень коряс оцю совещания, конань пингста ванфтольхть бизнесть, предприятиятнень, отраслятнень и граждаттнень ширеснон кирдемаснон коряс дополнительнай решениятне.
«Максфоль оценка сянди, мезе тиендеви, тяконь лувксса ажиотажнай вешфксти, конань няеськ и конань мархта тюреме, – шарфтсь мяль Артём Здунов. – Эсь лангозонза мяль шарфни ся, што мекольдень ков пяле мархтоста питнетне няевомшка кассть. Ломаттне марясазь тянь семейнай бюджетснон лангса. Президентсь тянь башка китькстазе. Сяс республикань Правительствать задачац – кирдемс ня кизефкснень контроль ала. Потребительскяй рынкать колга карматама корхтама штабоньконь заседаниянзон эса фалу. Экономикась, бизнесть ширенц кирдемац, заняфокс улемась, потребительскяй рынкась – ня кизефкснень лангс сембонди шарфтома башка мяль».
МР-нь велень хозяйствань и продовольствиянь министрсь Александр Кечайкин пачфтезе, што ётай недялять продовольственнай товархнень лангс отпускной питнень касома апак няйхть. Кирсь тувонь сивольть и алть питнесна. Региононь товаронь ноляйхне стаки мишендьсазь продукцияснон льготнай питнеса фирменнай сетевой магазиттнень эса.
«Ётай недялять ётасть Очижида ингольдень продовольственнай ярмаркатне. Синь няфтезь, што пяк и пяк оцю вешфкс тя или тона товархненди аш. Кепотьксонди, ускф 3 миллионда лама алхнень эзда мифоль 80%. Целайнек, продовольственнай продукциять объёмонза ярмаркатнень эса ульсть вешфкснень коряс», - шарфтсь мяль ведомствать руководителец.
Мордовиянь экономикань, торговлянь и предпринимательствань министрсь Алексей Грибанов пачтфтсь республикать руководителенцты сянь колга, кода моли бизнесть ширенц кирдеманц мератнень эряфс ётафтомасна, тяконь лувксса азондсь федеральнай мератнень од пакетснон колга. Тяфта, тифт полафткст системань тии промышленностень и торговлянь предприятиятнень специальнай кредитнай программазост, полафтсть условиятне коммунальнай инфраструктурать модернизациянцты займатнень максомаснонды. Министрсь стане жа азондсь туризмань сфераса грантовай поддержкать получаманцты заявкать анокламанц колга.
«Порученияцень коряс заявказонк сувафтоськ Инерка эрьхкть лангса Большеберезниковскяй районца комплексть и сяда тов мольфтьсаськ работать тя направлениять коряс. Средстватне туйхть инфраструктурань тиемс, тяконь лувксса пляшнень благоустройстваснонды», - азозе Алексей Грибанов.
Штабть заседанияса ванозь инвестиционнай проекттнень эряфс ётафтомстост рабочай од васттнень тиемаснон коряс кизефкснень. Тядде арьсеви тиемс 1511 рабочай васта, синь эвондайхть «Тепличное», «Биохимик», «Завод световых приборов», «Ковылкинский комбикормовый завод», «Вышинский деревообрабатывающий комбинат» предприятиятнень эса. Васенце кварталста тиф 257 рабочай васта – тя планть эзда 93%.
Штабса крхкаста ванозь системообразующай предприятиятнень производственнай мощностьснон загруженнайкс улемаснон. Тянь квалма пачфтсь МР-нь промышленностень, наукань и од технологиятнень министрсна Игорь Губайдуллин. Нинге сон азондсь системообразующай предприятиятнень мархта льготнай займатнень получамаснон колга – синь получазь ни «Рузхиммашсь», «ВКМ-Стальсь», Саранскяй телевизионнай заводсь, «ЭМ-Кабельсь».
«3,3 млрд. цалковай получаф ни, нинге фкя заявкась 300 млн. цалковаенди ванондови», - шарфтсь мяль министрсь.
Тяда башка, заседанияса ванозь строительнай отраслянь организациятнень мархта эрявикс процедуратнень ётамаснон сяда курокстоннекс тиеманц колга мератнень.
МСП-нь субъекттнень льготнай кредитованиянь антикризиснай программатнень колга, конатнень арьсезень Россиянь Банксь Российскяй Федерациянь Правительствать мархта, азондсь Мордовия Республикать коряс Национальнай банкть - Отделениять управляющаец Алексей Колосков.
Ёмла и средняй предпринимательствань субъекттненди льготатнень и ширень кирдемань мератнень максомаснон порядкать колга пачфтсь Саранск ошень округонь оцюнясь Игорь Асабин.
Нинге кабминонь члеттне ванозь Саранскяйса муниципальнай имуществать эффективнайста тевс ноляманц кизефксонзон.
Мордовия Республикань Оцюнять Пресс-службац