Совещаниясь ушедовсь Большеберезниковскяй райононь оцюнять Иван Игоновонь докладонц эзда. Самай тя районть территорияса ащи эсь лацонь эрьхксь. Сон азондсь полафткснень колга, конат тиевсть эрьхкть кереж трвасонза Мордовиянь Оцюнять тяса улемдонза меле – ламоц участкатнень эса срафтфтольхть перяфксне, урядафтольхть шлагбаумтне.
Алексей Грибанов, МР-нь экономикань, торговлянь и предпринимательствань министрсь пачфтсь республикань Оцюняти Инерка эрьхкть маласта территориять виияфнеманц колга, регионть лангс туристтнень мяльснон шарфтоманкса тя природнай объектть тевс ноляманц квалма. Артём Здунов мярьгсь, што петема-мазоптома Инеркать марнек трвац, а аф башка пяльксонза личнай участкатнень эса.
Эряви азомс, Мордовиянь Оцюнясь васендакиге кирдезе мяльса Владимир Грибановонь, сонь поместьяц занци аф ёмла территория Инеркать кереж трвасонза. Лятфтасаськ, этическяй и законодательнай оценка сонь тевонзонды максфоль недяляда тяда инголе Мордовиянь Госсобраниять сессиянц пингста, мзярда экс-банкирсь лихтьфоль «Единая Россия» партиять составста, мезьда меле депутаттне валхтозь Владимир Грибановонь местнай самоуправлениянь кизефкснень коряс комитетонь председателень должностьста. Экс-банкирсь тя пингс ашезе пяшкоде надияфтоманц педа-пес мрдафтомс вкладчикненди ярмакснон, конат ванфтовсть КС-Банкса. Артём Здунов китькстазе, што тя надияфтомась кирдеви контроль ала, сяс мес токсесыне республикань эряйхнень интересснон.
Инеркать туристическяй потенциалонц виияфнеманц колга мялензон-арьсеманзон стане жа азозень МР-нь вирень, охотничьяй хозяйствань и природопользованиянь министрсь Алексей Ларькин. Сон нинге весть лятфтазе, што ванфтови природнай территориять тевс ноляманкса улихть башка условият.
Предпринимательхне няфтезь Артём Здуновонди эрьхкть маласа территориять петеманц-мазоптоманц и туристическяй базань тиемать коряс проекттнень. Синь мяльса кирдезь арьсекшневи тиемс пляж, барбекю-зонат, эко-кинят, палаточнай ошкя, ведень инвентарень прокат. Мордовиянь Оцюнясь кирдезе лиятнень коряс сяда экологичнай проекттнень ширеснон, конат аф тиихть зиян эрьхкть эко-системанцты.
Артём Здунов макссь порученият, конат сотфт республикань сембе ведень объекттнень инвентаризацияснон мархта, сявондемок мяльс экологическяй и природоохраннай законодательствать. Тяда башка, сон шарфтсь мяль региононь водоёмтнень виияфнеманкса и ваймосемань туристическяй вастонь тиеманкса федеральнай средстватнень сяда эрьгавста тевс нолямаснонды.