Мордовиянь Оцюнять аф лама пингс тевонзон тиендисна Артём Здунов 6 апрельста етафтсь совещания Правительствань члеттнень мархта рабочай вастонь панжемань планть коряс. Целевой показательть мяльса кирдезь 2021 кизоня республикаса должен улемс панчф пцтай 1,5 тежянь рабочай васта экономикань эрь кодама отрасляса. Рабочай васттне кармайхть панчсевома аф фкя лацонь инвестпроекттнень вельде, тяконь лувксса «Рузаевка» инголяй социально-экономическяй вииякшнемань территориять рамкаса.
Мордовиянь Оцюнять аф лама пингс тевонзон тиендисна шарфтсь башка мяль Федеральнай казначействать проектонц лангс, конань мяльса кирдезь Саранскяйса панжеви Приволжскяй федеральнай округонь исполнительнай властень оргаттнень бюджетнай учетснон вятеманц коряс Центра. Но мзярс тяса улихть прябалат специалистонь-бухгалтеронь кочкамать мархта, конатнень должен улемс оцю профессиональнай компетенциясна. Сяс Артём Здунов макссь поручения Правительствати кярьмодемс тя структурати кадрань анокламати.
«Марса казначействать мархта мольфтеви тонафнема – эряви кочкамс ломатть, аттестовандамс синь и устроендамс работама. 300 бухгалтерсь должетт работамс тя центраса Саранскяйса и обслуживандамс ПФО-ть», - мярьгсь Артём Алексеевич.
Нинге фкя инвестиционнай вастсь – IT-технологиятне. Тяда инголе республикань Оцюнять аф лама пингс тевонзон тиендисна васетькшнесь отраслянь представительхнень мархта и корхтась мархтост марстонь работань ширетнень колга. IT-индустрияти, кода китькстазе Артём Здунов, вийс коре мрдафтомс емла родиназост ламоц высококласснай специалисттнень, кда аньцек республикаса кармайхть эрявикс условият.
«Тейнек эряви тиемс бизнести условият работаманкса, а синь кармайхть панчсема рабочай вастт, - мярьгсь республикань вятись. – И Правительствати эряви работамс тянь коряс фалу. Сяс мес предпринимательхне пшкятькшнихть тейне и мярьгондихть: «Минь мяленьке етафтомс тяза предприятиятнень, етафтомс ломаттнень, но тейнек аш васта, аф сатнихть площаттне». Тя кизефксне эрявихть сяда курокста решандакшнемс. Тиемс тянь аф сяшкава стака, кода няеви, но эффектсь тянь эзда кармай сатомшка оцю».
Мордовия Республикань Оцюнять пресс-службац