20 июльста Мордовиянь Оцюнять аф лама пингс тевонзон тиендисна Артём Здунов етафтсь рабочай васедема Россиянь Торгово-промышленнай палатать президентонц Сергей Катыринонь мархта. Ширетне ванозь Мордовиянь бизнес-сообществать странань субъекттнень мархта марстонь работанц эффективностенц вариантонзон, а стане жа корхтасть сянь квалма, кода касфтомс регионть продукциянц экспортонц.
Артём Здунов азозе, што республикась шарфни мяль РФ-нь ТПП-ть мархта сотрудничендамать сяда товолдонь виияфнеманцты. Сотрудничендамать фкя важнай ширец – оптиковолоконнай кластерсь. Прябалась тоса, што кой-кона российскяй компаниятне рамсихть импортнай, а аф отечественнай оптоволокна, аф ваномок РФ-нь Правительствать «О подтверждении производства промышленной продукции на территории Российской Федерации» постановлениянц лангс. Тянкса «Оптиковолоконные системы» АО-сь пяшкотьф 50 процентта кржада. Республикань вятись мярьгсь: «Тейнек важна ванфтомс Российскяй Федерациянь рынкать, коса тяниень пингть мольфтеви оцю стройка. Тейнек важна и магистральхнень трассировкасна, и оптическяй волокнать куду пачфтемац. Минь улихть омба масторонь конкурентоньке, минь тянкса аф таколттама, но, кода и лия странатне, примсетяма аралай мерат. Тяка пингть лувондсаськ, што аш кода нолдамс сянь, мзярда тя мератнень вакска старандайхть етамс минь российскяй компанияньке».
Стане жа МР-нь Оцюнять аф лама пингс тевонзон тиендисна азондсь сянь колга, што эряви сяда кемоста сотрудничендамс странань промышленнай предприятиятнень мархта. Кой-кона региональнай компаниятне работайхть аф сембе вийса. «Минь улихть промышленнай предприятияньке, конат эрявихть одкстоптомс. Марса «Трансмашхолдинг» АО-ть мархта минь ушедоме работама «Электровыпрямитель» ПАО-ть мархта. Эсь пингстонза инь оцю «Лисма» заводсь стане жа эряви одкстоптомс. Тейнек кармай эрявома идейнай и деятельнай лезкс», - китькстазе Артём Здунов.
РФ-нь ТПП-ть президентоц шарфтсь мяль, што Россияса работайхть 180 территориальнай торгово-промышленнай палата. Ламоцненди еткстост ули кода арамс партнеркс Мордовияти продукциять мимаса. «Оцю субъекттнень эса улихть стама ломатть, конат шарфнихть мяль сянди, мезе ноляви республикаса», - мярьгсь Сергей Катырин.
Тяда башка, ширетне ванозь республиканскяй продукциять экспортонц касфнеманц коряс кизефксть. Азф мяль пуроптомс МР-нь предприятиятнень бизнес-миссияснон Российскяй Федерациянь Торгово-промышленнай палатать омба масторонь представительстванц участиянц мархта.
Мордовия Республикань Оцюнять пресс-службац