17 декабрьста Мордовиянь Оцюнясь Артём Здунов примась участия «Российскяй Федерациянь финно-угорскяй нароттнень Ассоциациясна» Общероссийскяй общественнай организациять VII съездсонза, кона ня шитнень ётай Саранскяйса. Тя оцю пуромкссь водендаф гражданскяй марстоньшить и эсь прянь марямать кемокснеманкса, странань лама нациянь народть эсь лацоньшинц ванфнеманкса, межнациональнай сотрудничендамать и межэтническяй соткснень виияфнеманкса. Съездс пуромсть ломатть Российскяй Федерациянь 43 регионцта, коса эряйхть финно-угорскяй наротт. Пуромкссь ётафтови санитарно-эпидемиологическяй вешфкснень пяшкотькшнезь.
РФ-нь Президентть Администрациянц Вятиенц полафтыенц Магомедсалам Магомедовонь эзда приветствиять лувозе РФ-нь Президентть внутренняй политикать коряс Управлениянц национальнай политикань Департаментонц главнай советникоц Алексей Яковлев. Эсонза азфоль: «Финно-угорскяй нароттне занцихть оцю васта российскяй государственностть кемокснемаса. Тячи Российскяй Федерациясь правас коре занцесы васенце вастть народъётконь финно-угорскяй движениять эса. Финно-угорскяй культурать эсь лацонь коенза-обуцянза ащихть российскяй культурати, Россиянь кялень ламошити аф явфтови пяльксокс».
Республикань Оцюнясь шумбракстсь делегаттнень мархта мокшень и эрзянь кяльса и сюконясь Россиянь АФУН-ти сувсихненди эсь лацонь культурать ванфнеманкса. «Финно-угорскяй нароттне лама век ванфнесазь эсь койснон-обуцяснон. Минь народоньконь кемот раднянь соткссна! Тинь няфнетяда марстоньшинь цебярь пример и международнай уровеньца», - китькстазе региононь вятись.
Мордовиянь Оцюнясь шарфтсь башка мяль аф коммерческяй организациятнень покодемаснон виияфнеманцты. «Тяниень пингть НКО-тнень пяк лама возможностьтост. Фонттне азонкшнихть эрь кодама грантт мялентень-арьсемантень пяшкодеманкса. Тядде финансирования сатсть 30 проектсь. Ламоц мяльхненди-арьсематненди максфоль оцю питне федеральнай уровеньца», - мярьгсь Артём Здунов.
Покодемань результаттнень колга эсь докладсонза Россиянь АФУН-ть председателец Пётр Тултаев тяшкстазе, што маластонь кизотнень эряви шарфтомс башка мяль цифровой пространствати. Россиянь финно-угорскяй кяльхне эвондасть ни онлайн-переводчикнень эса, коряваст ладяф социальнай сетьтнень интерфейссна. Ащи задача сяда эрьгавста покодемс тя ширеть коряс и тиендемс шачема кяльхнень и культурать сяда содавиксокс Интернетса.
Пуромксса корхтасть РФ-нь АФУН-ть региононь отделениянзон представительсна. 18 декабрьста делегаттне поладсазь эсь работаснон.
Мордовия Республикань Оцюнять пресс-службац