Москуса 14 апрельста етась Россиянь Госсоветть президиумонц и Стратегическяй инициативань агентствать марстонь заседанияснонды анокламать коряс семинар-совещания. Региононь оцюнятне, властень федеральнай оргаттнень представительсна и эксперттне ванозь кизефкснень, конат сотфт Национальнай социальнай инициативать (НСИ) эряфс етафтоманц мархта. Работаса примась участия Мордовиянь Оцюнять аф лама пингс тевонзон тиендисна Артём Здунов.
Заседанияда инголе участникне ульсть Москувонь Мещанскяй районца «Моя работа» населениять занятостенц коряс центраса и Арбат столичнай районца 38№ идень ошень поликлиникать 2№ филиалсонза, штоба содафтомс сянь мархта, кода ломаттне получсихть социальнай услугат.
Семинарть-совещаниять пингста корхтафоль социальнай сфераса услугатнень качестваснон и доступностьснон колга, сянь, кода синь макссевихть россияниттненди, кодама перяфкст улихть, а стане жа сонцень НСИ-ть механизманц и региоттнень эса эряфс етафтоманц квалма. Стане жа васедемань участникне шарфтсть мяль соцуслугатнень, медицинскяй лезксть, образованиять, населениять занятостенц коряс сфераса услугатнень получамста граждаттнень частнай ситуацияснон лангс.
«Цельсь тоса, штоба полафтомс ломаттнень эряфснон, штоба теест улель удобна. Сяс вов тя корхтамась, конань азозе Стратегическяй инициативань агентствась, пяк важнай», - мярьгсь президентть администрациянц вятиенц васенце заместителец Сергей Кириенко.
Сонь валонзон коряс, «решениятненди етамда инголе пяк важна тиемс анализ опытти и сембе цебярти, мезе тиендеви региоттнень эса».
«Кизефксне, конатнень минь ванондсаськ, фатнесазь работаньконь оцюшка пяльксонц – бюджетть карьхцензон 60-70 процентсна ащихть образованиянь, здравоохранениянь, социальнай араламань и населениять занятостенц коряс отраслятнень эса. Бюджетнай сфераса работайхнень 70 процентсна – тя самай тя сфератнень эса покодихне, тя миллиотт ломань, конат эрь шиня лисендихть работама и макссихть лезкс, услугат странаньконь сембе эряензонды», - азозе Москувонь мэрсь Сергей Собянин.
Совещаниянь итокнень коряс азовихть предложеният соцсфераса услугатнень максомаснон цебярьгофнеманкса. Арьсекшневи, што тяда меле, кода Россиянь Правительствась педа-пес шумордасы работать НСИ-ть целевой моделензон коряс, региоттненди ули кода сувафтомс синь тевс эсь ширесост, сявондемок мяльс территориальнай эсь лацонь ширетнень.
Россиянь Госсоветть президиумонц марстонь заседанияц АСИ-ть участиянц мархта етай 15 апрельста. Соцуслугатнень и НСИ-ть колга доклад мархта выступандайхть Госсоветть «Социальная политика» ширенц коряс комиссиять председателец, Новгородскяй областень губернаторсь Андрей Никитин, вице-премьерсь Татьяна Голикова, АСИ-ть оцюняц Светлана Чупшева, Москувонь мэрсь Сергей Собянин.
НСИ-ть инициативац етафтови АСИ-ть мархта Россиянь Президентть Владимир Путинонь поручениянц коряс. НСИ-сь – тя ломаттнень эряфснон цебярьгофнеманц коряс федеральнай и региональнай мерань комплекс. 2020 кизоня НСИ-нь механизматне варжафтольхть тевса Новгородскяй, Нижегородскяй, Кемеровскяй, Калининградскяй, Сахалинскяй областтнень эса и Башкирияса. 2021 кизоня НСИ-сь должен улемс сувафтф тевс марнек странаса.
НСИ-нь механизмати сувсихть несколька пялькст: госуслугатнень получамста перяфкснень содамасна и синь машфтомасна, региоттнень эса инь цебярь целевой модельхнень и решениятнень тевс сувафтомасна, федеральнай уровеньца нормативно-правовой базати полафтксонь сувафтомась, ломаттнень эзда меки моли соткссь.
Проектсь фатнесыне ниле сфератнень – образованиять, здравоохранениять, социальнай обслуживаниять и трудоустройствать. Эрьть эса кочкафт инь келиста васьфневи эряфонь 10 ситуациятне, конатнень мархта эряви работамс: кепотьксонди, устроендамс шабать идень саду, получамс амбулаторнай или стационарнай медицинскяй лезкс, ладямс соцобслуживания эряфкшу радняти, получамс идень пособия или мумс работа занятостень центрать вельде.
Мордовия Республикань Оцюнять пресс-службац