Москуса ульсь Мордовиянь Оцюнять Артём Здуновонь и Россиянь Правительствать Председателенц заместителенц Дмитрий Чернышенконь рабочай васедемасна.
Пингстонза корхтафоль регионть социально-экономическяй виияфнемань программатненди инфраструктурнай проекттнень сувафтомаснон и импортонь полафтомань кизефкснень колга.
Мордовияса работай телекоммуникационнай оптическяй волокноть серийнай производстванц коряс Россияса фкя и тяка заводсь – «Оптиковолоконные системы» АО-сь. Пяшксе циклань технологияти сонь ётамац лезды атказамс омба масторонь сырьёть эзда и полафтомс сонь отечественнайть лангс. Тянь колга корхтафоль 2021 кизонь октябрьста республиказонк вице-премьерть самстонза.
«Оптоволокнось – IT-сферань ключевой материалхнень ёткста фкясь. Тяниень пингть заводсь работай сембе вийса и пяшкотькшнесыне странать вешфксонзон 50 процентта. И тяниень ситуацияса эряви касфнемс предприятияса импортонь полафнемать. Мон кирнесайне заводть омбоце очереденц строяманц коряс Мордовиять планонзон ширеснон. Тя максы 90 процентта пяшкодемс оптоволокноса странань рынкать вешфксонц», - мярьгсь Дмитрий Чернышенко.
Артём Здуновонь валонзон коряс, регионць тяниень пингть ванондсы ули-аф кода строямста нолдамс тевс ВЭБ.РФ госкорпорациять инструментонзон. Тядде арьсекшневи анокламс проектно-сметнай документациять, сай кизоня – ушедови производствать строямац.
Васедемаса стане жа корхтафоль республикать социально-экономическяй виияфнемань программати кой-кона инфраструктурнай проекттнень – идень садть строяманц и автомобильнай китнень и теплосетьтнень петемаснон сувафтомаснон колга.
Мордовия Республикань Оцюнять пресс-службац