2 декабрьста етась Мордовиянь Оцюнять аф лама пингс тевонзон тиендиснон Артём Здуновонь и Саранскяень мэрть Петр Тултаевонь официальнай форматса васенце рабочай васедемасна. Корхтамась мольфтевсь ся кизефкснень колга, конат сотфт столичнай муниципальнай образованиять эряфонц мархта. Стане жа корхтафоль ошень округть прябаланзон квалма, конат эрявихть сяда курокста решандамс, сяс мес синь пичефтьсазь Саранскяень ламоц эряйхнень. Тяконь лувксса – уроз шабатнень и семьятнень, конатнень эрявихть цебярьгофтомс эрямань условиясна, эряма вастса обеспечендамасна, аварийнай и ташта эряма вастста ломаттнень етафтомасна, социальнай и бытовой сферань объекттнень строямасна, од райоттнень эса инженернай инфраструктурать тиемац, кинь строямась.
Мордовия Республикань Оцюнять пресс-службац