Лицейса Мордовиянь Оцюнясь содафтсь тонафнемань заведениять работанц мархта, корхнесь педагокнень и школьникнень мархта. 11 классонь учениксь Артём Сурин няфтезе региононь руководительти ушеткшни сноубордисттненди тонафнеманди и инвалиттненди реабилитациянь ётаманкса лама функциянь тренажёрть, конань аноклазе сонць и кона сатсь Гран-при «Школьный патент – шаг в будущее» идень Международнай конкурсса.
Тяда башка Мордовиянь Оцюнясь содафтсь шабатнень лия творческяй проектснон мархта, кона стане жа получась Международнай конкурсонь Гран-прит. Тя одкстоптф школьнай музейсь – Саранскяйса шачф-касф военнай кинооператорть Владимир Сущинскяень музеец. Сущинскяй шавовсь Польшать воляс нолдамста 1945 кизоня. Школьникне марса историянь учительть Марина Баркинать мархта тиезь школьнай музейть сайтонц, ётафтомок оцю работа экспонаттнень цифровизацияснон коряс.
Сонць музейсь панчфоль 14№ саранскяй школаса ( коса тяни ащи 43№ лицейсь) нинге 1964 кизоня, и колганза содасть аньцек тя школань выпускникне. Тяни, сайтть тиемда меле, Владимир Сущинскяень колга ули кода содамс странань эрь эряйти.
«Пяк цебярь работа тинь ётафтоде, пяк эрявикс, сюкпря теенть тянкса», - мярьгсь Артём Здунов.
Музейса ётафтфоль круглай шра, коса корхтафоль экспозициять виияфнеманц и героическяй кинооператорть колга информациянь сяда товолдонь кочкамать квалма. Вдь тя пингс ашезь удала мумс Владимир Сущинскяень раднянзон. Надиямась тяни – информационнай технологиятнень лангс. Кинооператорсь калмаф Ченстохов польскяй ошса, и тяни, кой-кона источникнень информацияснон коряс, странаньконь лангс западнай государстватнень эсь лацоннекс ваномаснон инкса ули оцю пелькс, што калмось, коса калмафт советскяй солдаттне, срафтови-калафтови. Сяс Мордовиянь Оцюнясь надияфтсь ваномс тя кизефксть Россиянь Военно-историческяй обществать мархта, тяконь лувксса арьсемс Владимир Сущинскяень калмафонц Саранскяи ётафтоманц колга.
Мордовия Республикань Оцюнять пресс-службац