9 апрельста Мордовиянь Оцюнять аф лама пингс тевонзон тиендисна Артём Здунов примась участия межрегиональнай строительнай конференцияса, кона етафтфоль марса республикань Строительствань, транспортонь и дорожнай хозяйствань министерствать расширеннай коллегиянц мархта. Корхтамаса примась участия Российскяй Федерациянь строительствань и жилищно-коммунальнай хозяйствань министрсь Дмитрий Волков и властень федеральнай оргаттнень представительсна.
Заседаниять карша Артём Здунов работай ялганзон мархта ванозе республиканскяй предприятиятнень выставкаснон, конатнень продукцияснонды ули вешфкс строительнай сектарса. Конференциянь участникненди азондсть продукциять колга. Ламось ноляви тевс федеральнай стройкатнень эса.
Артём Здунов спасибась федеральнай коллеганзонды межрегиональнай строительнай конференциять лангс мялень шарфтоманкса. Мордовиянь Оцюнять аф лама пингс тевонзон тиендисна азозень регионца строительнай отрасляса уликс прябалатнень, васенцекс конатнень еткста азозе кадрань аф сатнемать. «Миньцонк аф сатнихть кадратне проектированияса и экспертизаса. Тянкса тарксеви строямань пингсь, вятни одукс строямати и ламоц комиссиятненди. Сембось тя пяк питни. Кда тейнек удалай мумс кит-ятт МР-са проектнай институтть панжеманкса или муви цебярь партнер, эста регионць тии оцю аськолкс инголи строительнай сфераса», - азозе МР-нь Оцюнять аф лама пингс тевонзон тиендисна.
Омбоце важнай прябалакс Артём Здунов азозень педа-пес апак строяк объекттнень и башка лоткась Универсальнай залть лангс, кона ащи Тысячелетиянь площадьса. Региононь вятись мярьгсь, што сон эряви строямс, нолямок тевс тяниень пингонь технологиятнень. Универсальнай залсь должен служамс лама киза.
Кепотьфоль стане жа строительстваса и ЖКХ-са производительхнень ширеснон кирдеманц коряс кизефкссь. Промышленнай кооперациянь системать виияфнеманц коряс поручения максф ни кафта министерстватненди: МР-нь Экономикань, торговлянь и предпринимательствань, а стане жа Промышленностень, наукань и од технологиянь. Регионть инголе оцю планонза. «Мяленьке няемс конкретнай результатт. Строяма минь карматама лама. Минь примсетяма активнай участия строительствать коряс национальнай проекттнень эса. Аф аньцек эсь строительнай организацияньке, но и строительнай материалонь промышленностсь должетт мумс эсь вастснон сай пингонь проекттнень эса», - мярьгсь Артём Здунов.
МР-нь Правительствать Председателенц заместителенц – строительствань, транспортонь и дорожнай хозяйствань министрть тевснон тиендисна Виктор Цыганов пачфтезе, што, аф ваномок коронавируснай инфекциянь пандемиять лангс, Мордовиясь ашезень лоткафне строительно-монтажнай работатнень, тяка пингть пяшкотькшнемок санитарно-эпидемиологическяй сембе вешфкснень. 2020 кизоня шумордавсь 70 производственнай и социально значимай объекттнень строямасна: строяфт идень 6 сатт, 2 школат, социальнай обслуживаниянь 4 объектт, культурнай назначениянь 3 объектт. Стане жа тевс сувафтфт автомобильнай кинь и путепроводонь участкатне, производственнай назначениянь 11 объектсь, полициянь отделсь, торговлянь и инфраструктурань объекттне. Республикать территорияса строяф 324,5 тежянь квадратнай метра эряма васта, мезсь арась 101,1 процент 2020 кизонди плановай показательти.
Тяддень май ковста республиканскяй законодательствати сувафтфт полафткст, конат макссихть тумс точечнай застройкать эзда и ушедомс нолямост тевс территориятнень комплекснай виияфнемаснон коряс механизматнень. Кочкафт ни тянкса площадкатне – од застройкать территорияц кармай 1 миллионда лама квадратнай метра. Тячи строямань стадияса ащихть лама квартирань 51 кудсь, конатнень марстонь площадьсна 230,1 тежянь квадратнай метра, строительствать вятьсазь 24 застройщиксь.
«6,5 процент алу льготнай ипотекать» вельде 2020 кизоня аф миф эряма васттнень объемсна республикаса кирсь колмонь-крда. Сембоц 2020 кизоня кредитнай организациятнень мархта максф 7818 ипотечнай жилищнай кредит 16 865,0 миллион цалковаень лувксса.
Республиканскяй бюджетонь средстватнень вельде 6545 семьясь, конат вешсть эряма вастонь условияснон цебярьгофнемаснон, получасть гослезкс ипотечнай кредиттнень коряс процентнай ставкать пяльксонц пандоманкса, а стане жа ипотечнай жилищнай кредитть пяльксонц и педа-пес пандоманкса. Финансированиять объемоц арась 333,9 миллион цалковай.
Эряма вастонь строямать виияфнеманкса Россиянь Минстройсь кемокстазе, што республикати максови субсидия федеральнай бюджетста 2021-2024 кизотненди, сонь лувксоц 2 792 580,1 тежянь цалковай, ярмакне нолдавихть тевс Саранск ошса и республикань муниципальнай райоттнень эса 30 объектть строяманкса. Строявихть идень сад, 136 вайгяльбень кувалмоса инженернай сетьт эряма вастонь строяманкса, а стане жа 93 вайгяльбень кувалмоса ульцятнень транспортнай инфраструктуранкса.
Корхтамок аф шумордаф строительствать колга, аноклафт и кемокстафт платт тяфтама объекттнень талекаснон этапонь этап кирьфтаманкса. Социальнай инфраструктурань 6 объекттне ламода анокт ни и сувафтовихть тевс 2021-2022 кизотнень.
Мордовия Республикань Оцюнять пресс-службац