Саранскяйса Победань площадьса ётафтовсь торжественнай митинг. Ся кизонь пелькс событиянь участникненди и свидетельхненди сюконяма, сяськиень поколенияти спасибань азома, сембонь сятнень лятфтама, кит тяни ашет мархтонк, сашендсть ошеряйхне и Мордовиянь столицань инжихне.
Митингть-реквиемть ушедомда инголе Мордовиянь Оцюнясь, «Единая Россия» партиять Мордовскяй региональнай отделениянц секретарец Артём Здунов маладсь ветераттненди и тылонь труженикненди. Сон люпштазень геройхнень кядьснон и азсь спасибамань валхт нацизмать инкса аралаф мирть, Родинаньконь воляшинц и кинге эзда аф ащеманц инкса.
Мордовияста 1941 кизоня фронту тусь 240 тёжяньда лама ломань, пяледа ламосна ашесть мрда. Республикать территорияса пуропневсть воинскяй частть, военнай тонафнемань заведеният, панчфоль 14 госпиталь, авиачасттнень обслуживандаманкса строяфоль 20 лама аэродром. Солдаттне аралакшнезь Родинать передовойса, сиретне, аватне и иттне – тылса. Семботь, мезть ульсь кода, республикась макссезе фронтти.
Торжественнай митингть панжемста Мордовиянь Оцюнясь поздравляндазень пуромфнень странаньконь историяса Великай шить мархта: «77 кизода тяда инголе минь араласьк родной Отечествать, нолдаськ воляс фашизмать эзда ламоц странатнень и нароттнень. Республикасонк шачф-касф ломаттне тиендсть героень тефт сембе фронттнень эса: Брестскяй крепость араламста, Москуть, Ленинградть, Севастопольть инкса ащемста, Сталинградть ала и Курскяй дугать лангса тюремста, Украинань, Белоруссиянь союзнай республикатнень и сембе Европать воляс нолдамста. Тылонь труженикне, аф ваномок ашушить и вачашить лангс, сатнезь Победать станокнень ваксса, паксяса, Сурскяй рубежса и госпитальхнень эса. Марса аватнень и сире ломаттнень мархта тылса стака сталмот кирдсть-кандсть оцю ломанькс курокста араф шабатне. Вечнай толть ваксса минь сюконяфнесаськ пряньконь сембонь сятнень мяляфтоманкса, кие ашезь мрда войнаста, кие эреклафнезе народнай хозяйствать аделавомдонза меле. Сембось тя тиф минь инксонк, шабаньконь, сяськиень сай пингонь поколениятнень инкса!»
Республикань руководительсь азозе, што тячи кода аш мзярдовок эряви азонкшнемс эсь шабаньконди и уноконьконди аляньконь и атяньконь подвигснон колга, геройхнень квалма, конат сатозь Победать.
«Лама кизонь ётазь, мзярда нацизмась тага ушеткшни кепсема прянц, западнай странатнень озадонь седихть ащекшнемаснон пингста, минь аралакшнесаськ лама национальностень народоньконь и сембе ломаттнень интересснон. Российскяй Федерациянь Верховнай главнокомандующайсь, Россиянь Президентсь Владимир Владимирович Путин лемдезень геройкс Украинань нароттнень воляс нолдамаснон коряс специальнай военнай операциянь сембе участникнень. И эрь боецти, синь раня и мала ломаньцнонды пяк эряви минь ширень кирдеманьке», - китькстазе Мордовиянь Оцюнясь.
Сон спасибась Мордовиянь эряйхненди Донбасста, Луганскяйста и Мариупальста республикань инжихненди лезксонь макссеманкса.
Мордовияса шачф-касф воиттнень, конат шавовсть 1941-1945 кизонь Великай Отечественнай войнать пингста, монументснонды путфтольхть панчфт. Победань площадьса торжественнай митингта меле ётафтфоль илань парад, конань участниконза шествиякс ётасть ошень центральнай ульцятнень эзга Мемориальнай калма лангс, штоба примамс участия панихидаса и путомс панчфт «Скорбящая мать» монументти и Саранскяень госпитальхнень эса ранатнень эзда кулоф воиттнень братскяй калма марняснонды.