20 февральста Республикань Кудса етась торжественнай мероприятия, кона лемтьфоль Отечествань аралаень шити. Торжественнай собраниянь участникнень, конатнень еткса ульсть аф фкя лацонь профессиянь представительхть, конат обеспечендакшнесазь странать араламанц, гражданскяй оборонать, общественнай безопасностть, од ломаттнень патриотическяй воспитанияснон, поздравляндазень Мордовиянь Оцюнять аф лама пингс тевонзон тиендисна Артём Здунов.
«Минь странаньке фалу марясь гордость мужественнай воинонзон инкса. Великай воинскяй традициятне, атяньконь-атяснон подвигснон инкса гордостень марямась кемокснесамазь минь, лезнихть молемс инголи и сяськондемс, - мярьгсь республикань вятись. – Башка мяль эряви шарфтомс Великай Отечественнай войнань сяськихненди. Ужяленди, мархтонк лядонды коль сяда кржа фронтовик, но Великай Победать колга мялямсь эряй эрь семьяса. Минь обязательна поладсаськ работать земляконьконь колга мялямть ванфнеманкса, воинскяй мемориалхнень благоустроендаманкса, ветераттнень колга фалу заботендамать. Тяса башка васта занци од поколениясь – поисковай движениянь участникне, юнармеецне, кадеттне, казакне, волонтерхне».
Благодарностень башка валхт азфтольхть воиттненди-профессионалхненди, кадровай офицерхненди и сятненди, кие ащи боевой постса.
2500 лама солдатсь-срочниксь и контрактниктсь честь мархта кандсазь российскяй армиять эса службать. Пцтай 500 курсантсь етайхть тонафнема военнай тонафнемань заведениятнень эса. Торжественнай собраниянь участникнень еткса ульсь и Ковылкино ошень воинскяй частень командованиясь.
Мероприятиять пингста максфтольхть государственнай казнет. Отечественнай войнань II степенень орденти, конань мархта казьфоль Ефим Терентьевич Артюшин, Мордовскяй АССР-са шачфсь-касфсь, удостоверениясь максфоль сонь уноконцты Марина Олеговна Крыловати.
«Ванфтовсь Ефим Терентьевонь фронтста мекольце сермац, кона кучфоль 1944 кизонь 30 майста. Сон сермады радня ломанензонды, што сонь сембось лац. Но 23 июньцта ни Ефим Терентьевич шавовсь тюремаса Ленинградскяй областьса. Подвигонкса сон казьфоль Отечественнай войнань II степенень орденца (куломдонза меле). Сембе тя кизотнень казнесь лядондсь апак макст. Сюкпря сембонди, кие примась участия тя работаса», - мярьгсь Артём Здунов.
Стане жа казнет максфтольхть афганскяй войнань, Кавказса боевой действиянь ветераттненди, правоохранительнай органонь, пожарно-спасательнай службань сотрудникненди.
Поздраавляндасайне сембонь Отечествань аралаень шить - илать мархта, кона лятфнесы, што минь пукша мархтотама и аноктама любой тердематненди. Катк пиндолды ару и мирнай менельсь минь Родинаньконь вельхксса. Паваз теенть и тинь мала ломанентенди, шумбраши и благополучия!» - мярьгсь Мордовиянь Оцюнять аф лама пингс тевонзон тиендисна.
Торжественнай собраниянь участникнень поздравляндазень стане жа Мордовиянь военнай комиссарсь Игорь Тихомиров. Властень оргаттнень, военнай комиссариаттнень марстонь работаснон и общественнай показательхнень вельде республикань призывникнень годностьсна арась тячи 80 процент.
Мордовия Республикань Оцюнять пресс-службац