Мордовиянь Оцюнять аф лама пингс тевонзон тиендисна Артём Здунов 9 апрельста етафтсь рабочай васедема Саранск ошень округонь оцюнять Петр Тултаевонь мархта. Корхтамась мольфтевсь тядде и сяда тов республикать столицаса общественнай территориятнень петемаснон-мазоптомаснон колга.
Ошень округонь оцюнясь азозе, што «Формирование комфортной городской среды» федеральнай проектть мяльса кирдезь 2021 кизоня петеви-мазоптови Т.Бибинать ульцяса парксь. Шумордафт законодательствать мархта ладяф сембе процедуратне – етафтфт торкне, кемокстаф муниципальнай контракт. Подготовительнай работатненди подряднай организациясь арьсекшни кярьмодемс 15 апрельста сявомок. Сембе строительнай работатне пяшкодевихть кизонь кофнень аделавомс.
Петеви-мазоптови территориять площадец пцтай 2 гектархт. Строительнай работатнень марстонь питнесна – 57,8 миллион цалковай, эздост 40 миллионць – федеральнай бюджетонь средстват, лядыкссь – ошень бюджетть средстванза.
Мордовиянь Оцюнять аф лама пингс тевонзон тиендисна китькстазе: сявондемок мяльс объектть оцю социальнай значениянц, эряви виияфтомс пяшкодеви работатнень качестваснон мельге контрольть.
Стане жа ошень округонь оцюнясь азозе, што 2021 кизонь 18 январьста сявомок 31 январти молемс примафтольхть предложеният общественнай территориятнень кочкамаснон коряс, конатнень арьсекшневи петемс-мазоптомс 2022 кизоня.
Мордовиять столицаса омбоце этапти етасть колма территориятне: Гагаринонь-Комаровонь ульцятнень эзга Подольскяй курсанттнень скверсна, Эрьзянь бульвароц, Саранка ляйть набережнаец (Титова ульцяста сявомок Ботевградскяй ульцяти молемс участкаса). Фкя и сяка территориять кочкаманц коряс мекольце рейтинговай голосованиясь етафтови 13.gorodsreda.ru федеральнай порталса тяддень 26 апрельста сявомок 30 майти молемс. Ся территориясь, кона кочкай сембода лама вайгяль, петеви-мазоптови 2022 кизоня «Формирование комфортной городской среды» федеральнай проектть мяльса кирдезь.
Мордовия Республикань Оцюнять пресс-службац