Мордовиянь Оцюнять и Куйбышевань машина кить оцюнянц васедемасна ушедовсь школань тонафнихнень мархта корхнемаста, конат састь республиказонк Россиянь «Знание» обществать и «Монь Мордовиязе» кадрань конкурсонь финалисттнень мархта аноклаф проектть мяльса кирдезь. Марса синь ардсть «Орлан» тяниень пингонь подвижной составса Саранскяйста Рузаевкав. Ардомста Куйбышевань магистральть оцюняц Вячеслав Дмитриев ётафтсь лекция шабатненди и азондсь Куйбышевань машина кить историянц и покодеманц колга.
Пачкодемста ванфоль «Рузаевка» станциять культурно-историческяй центрац.
Музейса пуроптфт историянь эсь лацонь документт, фотографият, машина кинь покодихнень личнай паршисна, машинисттнень частсна. Мордовиянь Оцюнясь сюконясь пуроптыензонды козя экспозициянкса и мярьгсь арьсемс туристическяй маршруттнень ёткста фкяти музейть сувафтоманц колга.
Артём Здунов ётафтсь совещания регионть и РЖД-ть марстонь покодемаснон коряс. Башка мяль шарфтфоль транспортнай обслуживаниять цебярьгофнеманцты. Вячеслав Дмитриевонь информациянц коряс, тяддень 11 ковста налоговай пандоматнень лувкссна, конатнень пандозь отраслянь предприятиятне республикань и местнай бюджетти, арась 437 миллионда лама цалковай, касомась пцтай 30 процент.
2022 кизоня арьсекшневи одкстоптомс подвижной состафнень, конат арнихть Мордовиянь станциятнень эзга.
Совещаниять пингста азфтольхть од мяльхть-арьсемат. Тяфта, азф мяль сотнемс Пензенскяй областть и Мордовия Республикать, кувалгофтомок Пенза — Булычёво маршрутть Рузаевкав и Саранскяи, кувалгофтомс Рузаевка — Зубово-Поляна маршрутть Тёплый стан станцияти молемс, эрь шиня нолямс электропоезтт Рузаевка — Зубово-Поляна — Саранск, Саранск — Зубово-Поляна маршруттнень эзга.
Мелянь декабрь ковста кемокстафоль программа 2021-2023 кизотнень машина кинь поезттнень эса ардомста зиянонь аф нолдаманкса. Программать мяльса кирдезь 2022 кизоня арьсекшневи строямс путепровод Ковылкино станциять 529 вайгяльбень вастсонза.
Стане жа азфоль мяль кемокстамс сотрудничендамать колга соглашения «РЖД» ОАО-ть и Мордовия Республикань Правительствать ёткса Рузаевка вокзальнай комплексть виияфнеманкса, а стане жа соглашения туризмань сфераса марстонь покодемать коряс.
Мордовия Республикань Оцюнять пресс-службац