Лятфтасаськ, Школьниконь российскяй движениясь эвондась странасонк 2015 кизоня Россиянь Президентть Владимир Путинонь Указонц коряс. Фестивальть пингста работась несколька образовательнай площадка, тяконь лувксса Н.П.Огарёвонь лемса МГУ-ть видеса, коза сашендсь и Мордовиянь Оцюнясь Артём Здунов. Сон корхнесь шабатнень и педагокнень, тядятнень-алятнень мархта, конат стане жа арасть фкя тематическяй площадкань участникокс. Тяфта, республикань руководительсь ульсь тядятненди-алятненди тренингса, педагокненди экстремизмать и терроризмать каршес ащемань кизефкснень коряс лекцияса, а стане жа школьникненди социальнай сетьтнень вятемаснон коряс мастер-класса.
Тяда башка, Мордовиянь Оцюнясь арась «Класснай васедемат» шабатнень ёткса содаф образовательнай проектонь инжикс. Проектсь ётафневи эряфс Российскяй Федерациянь Президентть Владимир Путинонь поручениянзон мяльса кирдезь. «Класснай васедематнень» пингста школьникне корхнихть мялень салай ломаттнень мархта. Тя мезть васедемась ульсь Культурань республиканскяй Дворецса.
Мордовиянь Оцюнясь поздравляндазень сембонь организациять шачема шинц мархта и арьсесь теенза касондомс-вииякшнемс, а стане жа спасибась школьникненди «Минь марсотама» движениять ширенц кирдеманкса. «Тя движениясь пяк эрявикс, сон лезни сятненди, кинди эряви ширень кирдеманьке. Мзярда лезнетяда тинь — оттне, эрьгафне — тя пяк питни. Верондада, што цебярсь, конань тинь тиендьсасть, обязательна мрдай теенть и тинь семьянтенди. Арьсян теенть арамс эряфса оцю профессионалкс», - мярьгсь Артём Здунов.
Шабатненди ульсь кода максомс кизефкст республикань руководительти. Очередсь микрофонти кувакаль — стирнятне-цёранятне кизефнезь республикань Оцюнять кельгома тевонзон, работанц колга, эняльдсть максомс советт профессиянь кочкамаса, а стане жа кеподсть ёфси оцювонь прябалат, конат вешихть решандама. Кепотьксонди,
Большеберезниковскяй райононь Марьяновка велеста кемонце классонь тонафнись Егор Бойков кизефтсь, мзярда велеряенза кармайхть арнема райцентрав петьф-тиф киге. Артём Здунов эстокиге макссь поручения телефононь пачк максомс тя кизефксть вице-премьерти Игорь Фрейдинонди, кона вятьсыне кинь строямань кизефкснень. Игорь Витальевич надияфтсь школьникти, што тя кизефкссь ули решандаф.
Мордовиянь Оцюнясь азондсь стане жа эсь школьнай и студенческяй кизонзон колга, сянь квалма, кода латцевсь эряфонь киц. Кельгома предметокс теенза ульсть историясь и математикась. Студентокс улемстонза Артём Здунов примсесь участия КВН-ца, тячемс мялец налхкомс кодамовок хоккейнай лигаса, а тяниень пингть инь оцю мяленза сотфт родной региононц виияфнеманц мархта. «Мон спасибан судьбати, што тя аф тёждя пингть повонь Мордовияв, марса эсь народозень мархта», - мярьгсь сон.
Мордовия Республикань Оцюнять пресс-службац