22 апрельста Республикань Кудса ётась Мордовиянь Общественнай палатать заседанияц. Эсонза примасть участия республикань Оцюнясь Артём Здунов и Федерациянь Советть Международнай тефнень коряс комитетонц Председателенц васенце заместителец Сергей Кисляк.
Мордовиянь Оцюнясь азозе мероприятиять основной повестканц – странать внешнеполитическяй тевонзон ширеснон кирдемаса гражанскяй обществать участиянь примаманц роленц ваномац. «Специальнай военнай операциясь и сембось, мезсь сотф мархтонза, аф тушенды экраттнень эзда, аф лисенди мялямстонк. Минь – ня событиятнень участниксна: Мордовияса тяни эряйхть ломатть ЛНР-та и ДНР-ста, лия территориятнень эзда, конатне нолдафт воляшис нацизмать эзда. Эздост сотцесаськ кодама обстановкась ульсь ня территориятнень лангса мекольдень кизотнень, кода мольфтевсь агитациясь Россиять каршес. Мекольце событиятне корхтайхть сянь колга, конашкава аф сетьмоль внешнеполитическяй ситуациясь странаньконь перьф мекольце кизотнень», - шарфтсь мяль Артём Здунов.
Сон китькстазе, што оцю лезкс и оцю ширень кирдема макссеви республикань Общественнай палатать и общественнай организациятнень мархта финансовай фонттнень пуроптомаса, социальнай ширень лезксонь максомаса, Мордовияв сафнень мархта сотксонь кирдемаса.
«Ломаттне марясазь эсь пряснон ламода сяда виикс, мзярда кирдьсазь синь ширеснон. Минь инжиень примай-васьфти народ: тееньк мзярдовок и киндивок ашезь сашендов кемокснемс тянь доказательстватнень вельде. Минь кирдьсаськ минценнетнень ширеснон и тиендьсаськ тянь седикс-ваймокс!» - мярьгсь Мордовиянь Оцюнясь.
Приоритетонди сон азозе од ломаттнень мархта работать. Башка васта тя направленияса занцема рузонь народть подвигонц колга историческяй видешить и мялямть ванфтоманцты. Тяни од ломанень средать информированиянь оцю сегментоц – блогерскяй сообществать кядьса, тияк сидеста тя категориять аш историянь инь эрявикс содамошисна.
«Ули эсь позицияньке, тееньк аш кода нолдамс историческяй видешить полафтоманц! Од ломаттнень мархта ётафневихть васедемат университетса, минь инь цебярь волонтерскяй движенияньке странаса, общественнай лама организацияньке. Эряви водендакшнемс сятнень, кие ашезь пяк эрявикс тя тевти. Самай тяфтама категориять лангс шарфтомат башка вийхнень», - китькстазе регионть руководителец.
Сон стане жа шарфтсь мяль, што Общественнай палатати тиема консолидация обществаса и ащема странать марстонь интересонзон инкса.
Историческяй мялямть ванфтоманц мяльса кирдезь, «Бессмертный полк России» Общероссийскяй общественнай гражданско-патриотическяй движениять региональнай отделениянц региональнай штабонц руководителец Николай Кручинкин тись несколька предложения, конатнень вельде од ломаттненди улель кода эрь шиня сотцемс землякнень подвигснон колга. Синь ширеснон кирдезень Мордовиянь Оцюнясь.
Тяфта, примаф Саранскяйса Вечнай толть ваксса фалунь дежурствать поладоманц колга и региононь школатненди Советскяй Союзонь и Россиянь Геройхнень, Мордовияса шачфнень лемснон максомаснон квалма решения.
Нинге ванозь Большеберезниковскяй райононь Николаевка велеса «Сурский рубеж» мемориальнай комплексть тиеманц и сонь военно-историческяй туристическяй маршрутти сувафтоманц колга кизефкснень.
МР-нь экономикань, торговлянь и предпринимательствань министрсь Алексей Грибанов и МР-нь социальнай араламань, трудонь и заняфшинь министрсь Игорь Князьков азондсть странаньконь каршес сувафтф ограничениятнень пингста граждаттнень и экономикать господдержкань мераснон колга.
Заседаниять пинста стане жа ульсь Россиянь Президентть Благодарственнай сёрманзон мархта каземась. Сергей Кисляк «Моя Мордовия» республиканскяй кадровай конкурсть ётафтомаса лездоманкса казьфоль Мордовия Республикань Оцюнять Благодарностенц мархта.
Мордовия Республикань Оцюнять Пресс-службац