Отраслять представителензон поздравляндазень Мордовиянь Оцюнясь Артём Здунов. «Мордовиясь лядонды светотехническяй промышленностень вяти центракс и валдти столицакс. Седи ваксста сюконян ламоц светотехникань ветеранонь поколениятненди, покодемань династиятненди, инженерхненди, покодихненди, наукань деятельхненди, сембе специалистненди, кие няфни тяфтама цебярь результатт. Арьсян сембонди кеме шумбраши, благополучия, сатфкст покодемаса и сембе инь цебярть», - мярьгсь регионтть лидероц.
Артём Здунов китькстазе, што Мордовияса тиф научна-производственнай комплекс. Сонь арсеналсонза – эсь лацонь изделият, конатнень аш аналогсна аф Россияса, аф омба масторса. Республикась вяти странаса инновационнай продукциянь долять коряс промышленнай производствань марстонь объемса и оцю пялькссь – именна светотехническяй продукциясь. Ётай кизоть электрическяй оборудованиянь производствань объёпне кассть 22% -тс тя 61 млрд цалковай.
Тя кизось арась юбилейнайкс кафта республикань флагматтненди - 75-кизоть васьфтьсазь «Лисмась и «Ардатовскяй светотехническяй заводсь».
Марс «световой приборонь Заводтть» мархта нолдаф эряфс импортозамещающяй светотехническяй продукциять массовай производствань организациять коряс проект. Няевикс путфкс отраслять касомазонза-вииямазонза сувафнихть и емла предприятиятне, конатнень ёткста можна лятфтамс «Рефлакс-С»-ть. Тя оцю давлениянь газоразряднай лампань тяка россиянь производительсь. Ётай кизоста предприятиясь касфтозе производствань объемть 67%-тс, количество инновационнай продукциянь лувкссь кассь нилень кърда.
«Кенярьфти, што минь ули сокровищницанеке - А.Н. Лодыгинонь лемса валдонь источниконь научна-исследовательскяй институтсь. Мордовиясь шарфни мяль наукать лангс, а мзярда ули тяфтама ладяф платформа, тейнек ули кода касфнемс инновационнай продукциять, и касфнемс-виияфнемс особо-экономическяй зонать», - мярьгсь Артём Здунов.
Профессиональнай илать мархта Мордовиянь светотехникнень тяфта жа поздравляндазь РМ-нь Госсобраниянь Председательсь Владимир Чибиркин и РМ-нь Правительствань Председательть полафтыец Батыр Эмеев. Инь цебярь отраслянь покодихненди ульсть казьфт государственнай наградат.