Артём Здунов: «Подрядчикнень мархта, конат эсь пингстонза аф пяшкотькшнесазь нацпроекттнень, контракттнень карматама лоткафнемост!»

Артём Здунов: «Подрядчикнень мархта, конат эсь пингстонза аф пяшкотькшнесазь нацпроекттнень, контракттнень карматама лоткафнемост!»

Мордовиянь Оцюнять аф лама пингс тевонзон тиендисна Артём Здунов 14 сентябрьста ётафтсь пуромкс, коса корхтамась мольфтевсь «Безопасные и качественные автомобильные дороги» национальнай проектть эряфс ётафтоманц колга. Тяса ульсь «Москва – Нижний Новгород» Упрдор ФКУ-нь управлениять вятиец Сергей Карпов.

Мордовиянь Оцюнять аф лама пингс тевонзон тиендисна китькстазе, нацпроектть мяльса кирдезь сембе объекттне эрявихть сувафнемс тевс эсь пингстонза. Ярмакта тянкса ноляви аф кржа: тядде нолдави 5 миллиартта лама цалковай, эздост 2 миллиартта лама цалковайсь – тя федеральнай бюджетонь ярмакт.

«Москва – Нижний Новгород» Упрдор ФКУ-нь управлениять вятиец азозе, што августста Россиянь Президентть Владимир Путинонь мярьгоманц коряс республикась получась 500 миллион цалковай РФ-нь Правительствать Резервнай фондстонза региональнай, межмуницпальнай и велень китнень петеманкса.

«Работась мольфтевсь эрьгавста – тяниень пингть контракттнень 90 процентсна кемокстафт ни, - азозе Сергей Карпов. – Аш таколдомат сянкса, што сембось тиф цебярьста. Тяни ванома тефнень пяшкодемаснон мельге».

Кода азозе Мордовиянь вятити республикань строительствань, транспортонь и дорожнай хозяйствань министрть тевонзон тиендисна Виктор Цыганов, «Безопасные и качественные автомобильные дороги» национальнай проектть мяльса кирдезь тядде арьсекшневи петемс 233 вайгяльбень кувалмоса региональнай кит, а стане жа 14,8 вайгяльбень кувалмоса кит Саранск ошень агломерацияса. Тяда башка, нацпроектть мяльса кирдезь тядде тевс сувафтови Рузаевкать шаркстоманц 1 этапоц, поладови  тя кить строяманц коряс 2 этапсь, сяда тов кармай строявома Строительнай ульцять эзга автомобильнай кись.

Мордовиянь Оцюнять аф лама пингс тевонзон тиендисна сюцезе подряднай организациять, сяс мес объекттнень строямасна мольфтеви ладяф пингть эзда лядондозь.

Стане жа пуромксса корхтафоль регионца федеральнай китнень строямаснон колга. Тяконь лувксса корхтамась мольфтевсь  Моску – Нижняй Новгород – Казань – Екатеринбург М12 федеральнай трассати малаткшни китнень петемаснон квалма.



Мордовия Республикань Оцюнять пресс-службац