Артём Здунов поздравляндазень республикань законодательхнень Российскяй парламентаризмань шить мархта

Артём Здунов поздравляндазень республикань законодательхнень Российскяй парламентаризмань шить мархта

Мордовиянь Оцюнять аф лама пингс тевонзон тиендисна Артём Здунов 29 апрельста примась участия МР-нь Государственнай Собраниять сессиясонза. Региононь вятись поздравляндазень законодательхнень Российскяй парламентаризмань шить мархта, арьсесь цебярь работа республикань эряйхнень эряфснон цебярьгофнеманкса.

«Депутаттне фалу ульсть эсь кочкайснон интересснон няфтикс любой уровеньца, - китькстазе Артём Здунов. – Пяк важна, штоба накаснень, конат сашендыхть избирательхнень эзда, минь марстонь вийса решандакшнелеськ. Минь эрятама мялень салай пингста – тяни инголенк ащи задача тиемс республикаса финансовай порядка, и федеральнай центрась кульсамазь минь. Оцю сюкпря тянкса, васендакиге, Российскяй Федерациянь Президентти. Владимир Владимирович Путин эсь Посланиясонза башка тянь отмечазе».

Лятфтасаськ, Федеральнай Собранияти Посланиянц эса государствань оцюнясь путсь Правительствать инголе задача анокламс предложеният региональнай и муниципальнай финанснень лама пингонь кемошиснон обеспечендаманц, региоттнень самостоятельностьснон касфнеманц коряс. Тяфта, корхтамась мольфтеви бюджеттнень коммерческяй шумоснон коряс ширень кирдемать колга. Коммерческяй шумоть, кона 25 процентта сяда оцю региоттнень эсь доходснон коряс, марнек объемонц Президентсь азсь мяль полафтомс госкредиттнень мархта, конат пандомат 2029 кизоть самс. Стане жа етафтови бюджетнай кредиттнень, конат максфтольхть региоттненди меля эпидемиять каршес ащеманкса, реструктуризациясна. Синь пандомань пингсна етай кафта ковда меле. Синь стане жа кувалгофтовихть 2029 кизоть самс. Тяда башка, федерациянь субъекттне получайхть касондомань-вииякшнемань од инструмент – инфраструктурнай бюджетнай кредиттне, конат максовихть инь ламось колма процент алу 15 кизос. Тя и лия решениятнень, конат азфтольхть Посланиять эса, башка оцю значениясна Мордовияти сонь оцюдонга оцю государственнай шумонц мархта.

Российскяй парламентаризмань шиня республикань законодательхненди максфтольхть государственнай казнет.

Сессиять пингста депутаттне вантсть несколька кизефкс, фкя инь васенцекс арась 2021 кизонди и 2022 и 2023 кизонь плановай пингти республиканскяй бюджетти полафтксонь сувафтомась. Синь сотнефт республикати федеральнай бюджетста 2 миллиартт 667 миллион цалковаень лувксса финансовай лезксть нолдаманц мархта. Эздост 1 миллиард 632 миллион цалковайсь нолдави «Безопасные и качественные автомобильные дороги» нацпроектть мяльса кирдезь кинь строямать-петемать обеспечендаманкса, 286 миллионць – медицинскяй организациятненди, конат работайхть ковиднай госпиталень режимса, дополнительнай финансовай лезксонь максоманкса, 210 миллионць – идень республиканскяй клиническяй больницять хирургическяй корпусонц строяманкса, 253 миллионць – аварийнай и ташта эряма вастста ломаттнень етафтоманкса и коммунальнай инфраструктурань системать одкстоптоманкса, 143 миллионць – велень территориятнень комплекснайста виияфнеманкса, 93 миллионць – коронавирусса сярядихнень пчкафнеманкса лекарственнай препаратонь рамаманкса, 20 миллионць – спортивнай инфраструктурань объекттнень технологическяй оборудованияса козякофтоманкса.

Мордовиянь финансонь министрть тевонзон тиендисна Сергей Тюркин стане жа азозе, што 2021 кизонь васенце кварталть республикань консолидированнай бюджетти налоговай и аф налоговай поступлениятне арасть 8 миллиартт 112 миллион цалковай, мезсь 1 миллиард 267 миллион цалковайда сяда лама етай кизонь тяка пингть коряс. Касомась арась 118,6 процент, тя 4 вастсь ПФО-са и 21 вастсь странать эзга.


Мордовия Республикань Оцюнять пресс-службац