Пялькстомань участникокс арасть Россиянь МЧС-нь Прявкс управлениятне Белгородскяй, Кировскяй, Нижегородскяй. Оренбургскяй, Пензенскяй и Ульяновскяй областьста, Марий Эл, Татарстан, Чувашия и Мордовия республикаста. Личнай зачётса пялькстыхть спортсметтне Пермскяй крайста, Ивановскяй, Тверской и Тюменскяй областьста.
Сембоц сатфксонкса пялькстыхть сядоть малава спортсмен. Ётксост Россиянь национальнай сборнаи сувайхне, ламоксть лисентьф сяськихне и призёрхне кода Сембе Россиянь, стане и народъётконь пялькстомаса. Командатнень составса Россиянь спортонь 24 мастер и 19 мастеронь кандидат.
Шумбракстомок пялькстомань участникнень, Артём Здунов тяшкстазе: «Пожарно-спасательнай спортсь – тя стама спорт, кона моли эряфста, службаста. Сембе упражнениятнень, элементтнень специалисттне ётафнесазь эряфс. Сюконян Россиянь МЧС-ти и сембонди, кит састь республиказонк. Минь васьфттядязь тинь кенярдезь, ванцаськ мялентень. Арьсян участникненди сатфткст, виде судейства, и катк сяськи инь виись!»
Россиянь МЧС-нь кадровай политикань Департаментть директороц Лев Трусов тяшкстазе ся эрявиксшить, мес региононь руководительсь шарфни оцю мяль пожарно-спасательнай спортть касфтоманц-виияфтоманц лангс. «Спортсь – тя аф аньцек кеме сяськома, но и цебярь физическяй форма, тяса ули кода панжемс эсь потенциалце, няфтемс воляшись и койсь виде сяськомаса, кемокстамс ваймоть и цебярьста марямс пря эсь вийхнень коряс», - азозе сон. Россиянь МЧС-нь физическяй анокламать и спортть коряс Центрать оцюняц Сергей Егоров китькстазе, што тяфтама пялькстомань ётафтомась – тя афкуксонь метод Россиянь МЧС-нь сотрудникнень профессиональнай уровеньцнон сатомс, а маштомашись и анокшись максомс лезкс стака пингть – ся качестватне, конат няфтьсазь пялькстомань участникнень.
Турнирть видеса тяряфтыхть ётамс перяфксонь китькснень, куцемс штурмовой куцемава тонафнема башняв, а стане жа кафтонь-крда тюрема, кона сувафни эсь эзонза штурмовой куцемава куцемать и сяда метрань келеса перяфксонь китьксонь ётамать.
Тяшкстасаськ, што пожарно-спасательнай спортть касомац-вииямац республикаса сатневи Мордовиянь Оцюнять Артём Здуновонь лезксонц вельде. Регионтть столицац сидеста арси эрь кодама пялькстомань ётафтомань центракс, синь лувкссост и народъётконь турниронь ётафтомась. Тяса кемокстаф масторлангонь колма рекордт и Россиянь 11 рекорд, котось эздост апак сяськ. Стане жа МР-ть коряс Россиянь МЧС-ть Прявкс управлениянц видеса покодихть пожарно-спасательнай спортть коряс идень секцият.
Стане жа почётнай инжихне ётафтсть «Полоса препятствий» лем ала дисциплинаса аватнень и алятнень ёткса сяськиень и призёронь каземань церемония.
Республика Мордовиянь Оцюнять пресс-службац