2022 кизоня Магма компаниянь группась ушедсь коське способонь производствань цементнай заводонь строяма, проектсь арьсеф вете кизос. Теенза максови питне 200 млн цалковайс. Мордовиянь Оцюнясь ванозе стрительствать молеманц. Производстваса кармай тиф 120 покодема васта 110 тёжянь цалковай ковти средняй заработнай плата мархта.
«Магма» ГК-нь директоронь советть председателец Сергей Сиушов азозе, предприятиять мощностец лисемста саты 1200 тёжянь тонна цементта кизоти. Тя сатомшка, штоба пяшкодемс эрявикс вешфкснень стройкаса 400-500 вайгяльбень радиусса.
«Минь няйсаськ рынкать, кона максы тейнек лац мишендемс нолдаф продукциять», - китькстазе Сергей Сиушов. Цементнай заводонди энергиянь фкя источникокс кармай альтернативнай топливась, ТКО-ть эзда производствать коряс линиять стане жа арьсеви ладямс Мордовияса
Оборудованиянь основной пачфтись – производительсь Китайста. Тяни строительнай площадкаса покодихть специалистт Поднебеснайта, марса турецкяй компаниять мархта синь мольфтьсазь строительствань этапть. Республикань Оцюнясь ванозень и бытовой условиятнень, конат тифт омба масторонь специалисттненди.
Ваномать песта Артём Здунов китькстазе инвестициятнень эрявиксшиснон региононь экономикати и макссь оцю питне проектть эряфс нолдаманкса.
«Строительствать эряви шумордамс курокста – эрь шись тя ярмакт. Тяконь лувксса аф эряви юкснемс и народъётконь соткснень колга, конат эрявихть омба масторонь покодихненди кеподемс вийснон, - тяшкстазе Артём Здунов. – Строительнай рынкась марнек странаса няфтьсы касомать, Мордовияса миньге касфтсаськ социальнай объекттнень и эряма васттнень строямаснон. Сянкса, цементть маркац, кона тяса кармай нолявома, содаса, кармай пяк востребовандаф. Няйса, што покодемась тяса мольфтеви цебярьста».
Стане жа «МагмаЦемент»-ть площадкаса ётась рабочай васедемась республикань Оцюнять «Магма» ГК-ть советть директоронц председателенц Сергей Сиушовть мархта. Корхтасть инвестпроекттнень и ГК-ть сяда товонь касоманц-виияманц коряс компаниять вельде эряфс нолдамасна, логическяй уськонянь ладямать и мимать коряс од рынкать тевс нолдамать.
Лятфтасаськ, што МАГМА компаниянь группась – Россияса фкя инь оцюсь пуроптф предприятиятнень ёткста, кона специализировандави полезнай ископаемаень сатомаса, строительнай и отделочнай материалонь тиемаса и дистрибьюцияса. «Магма» лемть ала продукциясь сувси странань инь цебярь производительхнень пятёркас и арась оцю экспортёркс строительнай материалонь областьса. Завоттне покодихть передовой технологиятнень коряс, продукциять качествац сатни инь оцю стандартть коре, а «Магма» лемсь кизоста кизос коль сяда келиста кемокснесы эсь позициянзон Россиянь и СНГ-нь странань строительнай кластерса.
Мордовия Республикань Оцюнять пресс-службац