Мордовиянь Оцюнять аф лама пингс тевонзон тиендисна Артём Здунов 22 февральста Рузаевскяй району рабочай поездканц рамкаса ульсь железнодорожниконь ошса идень од садса. Дошкольнай учреждениясь строяфоль «Демография» нацпроектть мяльса кирдезь, конань азозе странань Президентсь Владимир Путин. Кода пачфтезе Рузаевскяй райононь оцюнясь Александр Сайгачев, идень садть строямац лездсь машфтомс Рузаевкань тя микрорайонца очередть.
Садиксь арьсеф 108 вастонди, эрь группаса ули сембе эрявикссь налхксеманкса и тонафнеманкса. Васенце этажса сембе кияксне – эждевихть!
Республикань вятись шназе од дошкольнай учреждениять качестванц и тяса уликсть. Образовательнай технологиятне – инь оцю уровеньцот: штоба шабатне виензакшнельхть сембе ширде. Тяса и робототехникась, и идень республикаса фкя и тяка телевидениясь – Артём Алексеевич макссь поручения рузаевскяй ТВ-ть вятиенцты нолдамс тевс марстонь проект шабатнень мархта.
Идень садсь максси оцю возможностть шабатнень музыкальнай маштомошиснон виияфнеманксовок – кепотьксонди, тяса ули цифровой фортепиано. Республикань вятись кулхцондозе кода сон морай и кульфсь кеподезе мяленц: «Молодецтада, што ашеде экономонда – пяк лац кайги, и лама возможностьта максси тя инструментсь. Иттненди эряви сембода цебярсь!»
Мордовия Республикань Оцюнять пресс-службац