7 апрельста Россиянь премьер-министрсь кемокстась соглашения, конань мархта нолдась 9 миллиартт цалковай сахаронь и постнай ваень производительхнень карьхцьснон пяльксонц пандоманкса. Субсидиятне максыхть кемокстамс 1 килограмма сахарть питненц 36 цалковайть лангса оптовикненди и 46 цалковайть лангса розничнай рамайхненди, 1 литра вайть – 95 и 110 цалковайхнень лангса. Трансферттне явовихть заявкатнень мяльс сявозь, конат поступасть региоттнень эзда.
Странань премьерть мархта кемокстаф распоряжениясь видеста канневи и Мордовияти. Ромодановскяй сахарнай заводсь сувси Россияса кемонь инь цебярь предприятиятнень лувксс. Тяса нолдаф сахарть 2/3 пяльксоц мишендеви регионть эзда ширеса.
Мордовиянь Оцюнять аф лама пингс тевонзон тиендисна китькстазе кемокстаф документть оцю значениянц. «Тейнек пяк важна, што государствась кирнесы сахаронь производительхнень ширеснон – тяни тя сядонга пяк эрявикс, - китькстазе Артём Здунов. – Тя лезкс малаткшни производственнай сезонтть карша – сахарнай якстеряпсонь видеви площаттнень, производствань объемтнень касфнеманкса, рабочай вастонь панчсеманкса. Арьсян, тяфтама условияса тяддень урожайсь максы пяшкодемс сахарса вешфксть и пищевой промышленностти, и населенияти, а мезть сядонга оцю значенияц – кирдемс тя эрявикс продукциять лангс питнеть».
«Минь кирнесаськ Россиянь Правительствать ширенц, сяс кемокстаме соглашения мишендемань сетьтнень мархта ладяф питнеса сахарть мишендеманц колга – 36 цалковай килограмманкса. Сахаронь запасне республикаса арасть 48 тежянь тонна. Тя кизоня сахарнай якстеряпсонь видеви площаттне касфтовихть 17 процентта. Минь нолятама экстра-классонь сахар, кона ладяй любой технологическяй процессонди», - азозе «Ромодановсахарть» директороц Александр Атласов.
Лятфтасаськ, сахаронь и ваень производительхнень субсидированияснон колга примаф решениясь сувси продовольствиять лангс питнетнень кирьфтамаснон коряс мератнень лувксс, конат аноклафт Правительствать мархта странань Президентть Владимир Путинонь поручениянц коряс. Тя работать рамкаса полафтфтольхть питнетне кой-кона велень хозяйствань товархнень лангс, арьсеф лезкс почфонь яжайхненди, кшинь пидихненди, цебярьгофтф питнетнень мониторингса. Ситуациять лангс курокстонь реагированиянкса пуроптфоль межведомственнай рабочай группа, конань вятьсы васенце вице-премьерсь Андрей Белоусов.
Мордовия Республикань Оцюнять пресс-службац