Мордовиянь Оцюнять аф лама пингс тевонзон тиендисна Артём Здунов 15 апрельста етафтозе регионца промышленнай продукциять аф законц коре оборотонцты каршек ащемать коряс комиссиять заседаниянц. Эсонза примасть участия властень федеральнай органонь территориальнай оргаттнень, республикань министерстватнень и ведомстватнень, силовой структуратнень вятисна. Корхтамась мольфтевсь мератнень колга, конат примсевихть контрафактнай и фальсифицированнай лекарственнай препараттнень и медицинскяй назначениянь изделиятнень мишендемаснонды кить персеманкса. Тянь коряс работать колга азондсть МР-ть эзга Росздравнадзоронь территориальнай органонь, Мордовиянь Минздравонь, МР-ть эзга МВД-нь представительхне.
Республикань вятись китькстазе: потребительть эффективнай и доступнай лекарственнай средстваса обеспечендамац – тя национальнай безопасностень критерийхнень эзда фкясь. А лекарственнай препараттнень фальсификациясна, кда аф кирдемс контроль ала, может эвондафтомс оцю пелькс ломаттнень шумбрашиснонды и эряфснонды. Мировой прибыльностень статистикать коряс теневой фармацевтическяй рынкась ащи колмоце вастса оружиять и наркотикнень мельге.
«Мекольдень кизотнень РФ-са примафт мерат лекарственнай средстватнень и медицинскяй изделиятнень фальсификацияснон оборотснон каршес тюремать колга, - мярьгсь Мордовиянь Оюнять аф лама пингс тевонзон тиендисна, - Но мзярс ашезь удала сявомс контроль алу поставщикнень и частнай мишендихнень Интернетонь сетьса. Синь мишендихть и фармацевтическяй продукция, и медицинскяй оборудования. Тяса проверяй оргаттненди стака работамс – и меки моли сотксть, и производительть адресонц мумс стака. Тяда башка, мекольдень пингть минь анокламе кой-кодама метотт, сяс работать карматама мольфтемонза сяда тов. Тейнек эряви перямс кить контрафактти и араламс ломаттнень эряфснон и шумбрашиснон!»
Башка отмечафоль велетнень эса аптекатнень и ФАП-нь панчсемасна, касфтф эсост ассортименць, штоба кирьфтамс ломаттнень мархта кальдяв качествань продукциянь рамамань пельксть, тяконь лувксса интернетть вельде.
Мордовия Республикань Оцюнять пресс-службац