Мордовиянь Оцюнясь Артём Здунов 14 декабрьста видеосвязень режимса ётафтсь пуромкс, коса корхтафоль духовно-нравственнай воспитаниять колга.
Республикань вятись китькстазе: Россиянь обществать тяниень и сай пингоц ащи духовно-нравственнай козяшить, странань сембе нароттнень историянь и культурань койснон-обуцяснон ванфнемаснон эзда.
«Тейнек эряви шарфнемс од ломаттнень мяльснон нравственнай питнешитненди, - мярьгсь Артём Здунов. - Школась — фкя и сяка социальнай институтсь, конань эзга ётнихть Россиянь сембе эряйхне. Сяс тяса эряви башка васта макссемс аф аньцек интеллектуальнай ширети, но и культурнайти».
Кода азозе республикань образованиянь министрть тевонзон топафтысна Елена Солдатова, Мордовияса эряфс ётафневи иттнень и од ломаттнень духовно-нравственнай воспитанияснон коряс программа, кона сувафтфоль тевс 2015 кизоня. 2012 кизоста сявомок республикань сембе школатнень тонафнемань планозост сувафтф «Основы религиозной культуры и светской этики» тонафнемань курссь. Духовно-нравственнай воспитаниясь республикаса вятеви идень садста сявомок высшай учебнай заведениятненди молемс.
«Тядде республикань 6 школатне арафтфт пилотнайкс духовно-нравственнай ширеть эряфс ётафнеманкса: тя Ичалкань СОШ-сь, Советскяй Союзонь Геройть А.И.Семиковонь лемса Темниковань СОШ-сь, Чамзинка аймаконь 2№ Комсомольскяй средняй общеобразовательнай школась, Торбеева аймаконь Дракинскяй средняй общеобразовательнай школась, Саранскяень 30№ школась, Рузаевка аймаконь Тат-Пишленскяй СОШ-сь», - мярьгсь Елена Солдатова.
Пуроптф пилотнай школатнень мельге организационно-методическяй ваномать коряс рабочай группа, сембе школатнень мельге кемокстафт кураторхт «Педагог 13.ру» педагогическяй работникнень профессиональнай маштомошиснон апак лоткафнек касфнеманкса Центрань специалисттнень лувксста.
Корхтамаса ульсть Саранскяй и Мордовскяй митрополитсь Зиновий, Мордовия Республикань мусульматтнень Центральнай духовнай управленияснон муфтиец Фагим Шафиев, Н.П.Огарёвонь лемса МГУ-ть и М.Е.Евсевьевонь лемса МГПУ-ть оцюнясна, пилотнай школатнень директорсна. Покодемань опытонц кога азондсь Саранскяень 30№ школать директороц Вячеслав Жаров.
«2011 кизоня школасонк панчфоль 15 казачьяй кадетскяй класс, тяни эздост миньцонк 28, эсост тонафнихть 800 шаба, - азозе сон. - Школаньке тонафнемань инь оцю учреждениясь аф аньцек республикаса, но и Приволжскяй федеральнай округса. Олимпиаднай движениять коряс минь фалу сувсетяма республикань кемонь инь цебярь школатнень лувксс. Шабаньке аф лядондыхть шири Россиянь школьниконь движениять эзда. Ламоц выпускникне сяльде ушеткшнихть тонафнема военнай учебнай заведенияса».
Мордовиянь Оцюнясь кирдезе 30№ школань директорть республикаса кадетскяй движениять виияфнеманкса кой-кона мялензон-арьсеманзон ширеснон.
Мордовия Республикань Оцюнять пресс-службац