Мордовиянь Оцюнять аф лама пингс тевонзон тиендисна Артём Здунов 16 январьста Темниковскяй району рабочай поездканц рамкаса етафтсь васедема бизнесть мархта, корхтамась мольфтевсь тя территорияса внутренняй туризмать виияфнеманц колга. Корхтамаса Темниковскяй и лия маластонь райононь предпринимательда башка примасть участия республикань профильнай министерствань – Минэкономикань, Минсельхозонь, Минспортонь вятихне.
Мордовиянь вятись, панжемок васедемать, китькстазе, што территориять оцю туристическяй потенциалоц, но межведомственнай взаимодействиясь министерстватнень еткса апак ладяк, и тя лоткафнесы тя ширеть виияфнеманц. Тяни, кода башка китькстазе Артём Здунов, эряви сяда оцю мяль шарфтомс тянди.
Мордовиянь Оцюнять аф лама пингс тевонзон тиендисна макссь бизнесонь представительхненди кизефкс: кодама сталмот синь васьфнихть и кодама ширень кирдема лангс надияйхть. Корхнемась лиссь мялень салайкс, Артём Алексеевич путсь задача етамс, меколи, валхнень эзда тефненди, штоба Темниковскяй районць получаль вииякшнеманкса од импульс. Тяконь лувксса предпринимательхне кеподезь тяфтама кизефкснень: народно-художественнай промыслань мастерхнень продукцияснон мишендеманкса каналхнень келепнемасна, Темниковскяй районца событийнай культурно-развлекательнай мероприятиянь етафнемась и стак тов.
Сяда крхкаста тя ширеть коряс должен работамс и муниципалитетсь, нолямок тевс грантонь и федеральнай программань системать коряс ширень кирдемань сембе возможносттнень, тяконь лувксса нацпроекттнень эряфс етафтомаснон рамкаса. Улихть и объективнай сталмот, главнайсь конатнень еткста – инфраструктурать аф сатомшка виияфнемац, васендакиге – китнень. Сембода лияда башка корхтамась мольфтеви 14 вайгяльбень кувалмоса кинь участкать строяманц колга, кона видеста сотнесы Темниковать Нижегородскяй областень Дивеево велеть мархта, мезсь лезды водендамс району сяда лама турист.
«Тячи мон содафтонь районть мархта, и тинь тейне няфтесть, што тяса ули кода виияфнемс туризмать, - мярьгсь Артём Здунов. – Сяс ащи задача анокламс конкретнай проект, конань лангс ули кода получамс финансирования. Тя эряви тиемс курокста. Тяряфттама тиемс тяса «Саранск – Темников – Санаксарь» минцень региональнай кластероньконь».
Мордовия Республикань Оцюнять пресс-службац