Мордовиянь Оцюнять аф лама пингс тевонзон тиендисна Артём Здунов 12 майста рабочай поездка мархта ульсь Ельниковскяй районца. Мархтонза ульсть МР-нь Правительствать Председателенц тевонзон тиендисна Владимир Сидоров, вице-премьерхнень тевснон тиендисна Инсаф Хайруллин и Игорь Чадов, промышленностень, наукань и од технологиянь министрть тевонзон тиендисна Игорь Губайдуллин, райононь оцюнясь Юрий Бекешев.
Васенце вастокс, коса ульсь республикань вятись, арась Стародевиченскяй средняй школась. Сонь зданияц строяф 1976 кизоня, и тяниень пингть теенза эряви тиемс ремонт.
Учреждениять директороц Светлана Бертякова азозе Мордовиянь Оцюнять аф лама пингс тевонзон тиендиснонды, што эряви кемокснемс фундаментть, петемс вельхксть, а стане жа полафтомс вальмятнень.
Артём Алексеевич эстокиге макссь поручения Правительствань Председательть тевонзон тиендиснонды и вице-премьерхненди лац-ряц ваномс тя кизефксть и мумс лисема васта: или петемс уликс зданиять или строямс од, сявондемок мяльс тонафнихнень лувксснон.
Азсаськ, што Стародевиченскяй школать зданияц арьсеф 320 вастонди, но тяниень пингть тяса тонафнихть 53 шаба.
2019 кизоня «Образование» национальнай проектть эряфс етафтоманц мяльса кирдезь школаса панчф «Касомань васта» цифровой и гуманитарнай профилень образованиянь центра. Центрать работац мольфтеви основной общеобразовательнай программатнень коряс: «Технология», «Информатика», «ОБЖ» и аф фкя лацонь уровенень дополнительнай общеобразовательнай программатнень коряс. Мордовиянь Оцюнять аф лама пингс тевонзон тиендисна ульсь проектнай деятельностень кабинетса, коса школьникне тонафнихть налхкома шахматаса и лего-конструированияти, корхнесь шабатнень и учительхнень мархта.
Артём Здунов ульсь стане жа «Ельниковская дорожно-строительная механизированная колонна» АО-са. Основной тевда – автомобильнай кинь строямда башка, тяса работай шуфттнень переработкаснон коряс производства. Республикань вятись ванозе цехть, коса ноляви тумоста, келуста, ушторста паркет. Тяда башка, тяса ноляви кияксонь рейка, сруб-рейка, вагонка, шуфтонь евро-вальмат и шуфтонь блокт, кияксонь брус спортивнай комплексненди, куцеманянь пялькст, пиломатериалхт и шуфтонь лия изделият.
Артём Алексеевич макссь поручения республикань Минпромти ваномс мишендемань дополнительнай рынкатнень коряс кизефксть, а стане жа нолдамс тевс внутриреспубликанскяй производственнай кооперациять возможностензон, штоба кирдемс предприятиять ширенц, вдь рабочай васттне велеса пяк эрявикст.
Республикань вятись лама корхтась Ельниковскяй райононь оцюнять Юрий Бекешевонь мархта территориять социально-экономическяй виияфнеманц колга, тяконь лувксса корхтафоль социальнай инфраструктурать одкстоптоманц и тяфта лемдеви касома васттнень кочкамаснон колга, конат виияфтолезь районть экономиканц.
Башка мяль шарфтфоль уликс прябалатнень лангс. Тяфта, Артём Здунов прважазень Владимир Сидоровонь и Инсаф Хайруллинонь районнай поликлиникав, штоба ваномс сонь. Зданияти эряви тиемс ремонт, кода и корпусти, коса ащи скорай медицинскяй лезксонь станциясь и паллиативнай отделениясь.
Стане жа республикань Правительствать членонза Мордовиянь Оцюнять аф лама пингс тевонзон тиендиснон поручениянц коряс ульсть доломитовай кевть добуваманц коряс карьерса, кирпичть, тротуарнай плиткать и бардюрать производстваснон коряс заводса, «Ост Клинкер» аф оцю предприятияса, коса ноляви керамическяй кирпич, ванозь райцентраса паркть, коса ушедови капитальнайста петема «Жилье и городская среда» национальнай проектть мяльса кирдезь. Проектть мяльса кирдезь, кона аноклафоль Ельникань эряйхнень мяльснон-арьсемаснон мяльс сявондезь, август ковть аделавомс тяса эвондай петьф-мазоптф общественнай территория. Ладявихть беседкат, кизонь эстрада, аф фкя лацонь архитектурнай формат. Тяда башка, тяса эвондай WI-FI зона. Сембе кизефкснень, конатнень азозь райононь эряйхне, республикань вятись сявозень контроль алу.
Мордовия Республикань Оцюнять пресс-службац