25 октябрьста Мордовиянь Оцюнясь Артём Здунов Москуса Россиянь Правительствать Координационнай центрасонза ульсь РФ-нь Правительствать Оцюнянц Михаил Мишустинонь ширеса ётафтф пуромксса. Корхтамась тяконь лувксса мольфтевсь азотнай удобрениятнень инкса питнетнень кирьфтамаснон колга.
Михаил Мишустин лятфтазе, што велень хозяйствань сай кизоть ушедоманц итогонзонды юрсь ушеткшневи путневома тяддень сёксенда. «Президентсь мярьгсь лац-ряц ваномс, кода ащихть тефне, и 1 ноябрть самс анокламс мерат, конат лездыхть кирьфтамс Россияса Европань странатнень эса энергиять аф сатнеманкса зиянть. Тяконь лувксса - азотнай удобрениятнень, металлургическяй продукциять и продовольствиять инкса питнетнень касомаснон, - мярьгсь премьер-министрсь. – Эрьда тячи корхтатама ся аськолкснень колга, штоба, фкя ширде, удобрениятне улельхть зепс коре эсь рынкасонк, а омбоце ширде – ванфнемс тяфтама товаронь Россиянь производительхнень конкуренциянь кирнемаснон. Вдь тянь эзда ащи продукциять питнец.
Мордовияти аграрнай отраслять удобренияса козякофнемац пяк эрявикс – республикась занцесыне васенце васттнень Приволжскяй федеральнай округонь и Российскяй Федерациянь региоттнень ёткса фкя эряйти велень хозяйствань ноляви продукциять объёмонзон коряс. Тяддень вейхкса ковонь показательхне кемокснесазь – Мордовиясь занцесы 1 вастть Россияса и 1 вастть ПФО-са алхнень и лофцть нолямаснон коряс, 6 вастть Россияса и 2 вастть ПФО-са – сиволть ноляманц коряс. Республикась аф аньцек педа-пес пяшкотькшнесыне эсь вешфксонзон, но и мишенди продукция лия региоттненди. Ноляви кой-кона продукциятнень 40-80 процентсна пачфневи республикать эзда шири.
2021 кизоня республикань аграрийхне нолдасть тевс 150 тёжянь тонна минеральнай удобрения. Сай кизоть арьсекшневи рамамс 155 тёжянь тонна – тяниень пингть республикань хозяйстватненди пачфтьф ни 60 тёжянь тонна удобрения.
Мордовия Республикань Оцюнять пресс-службац