Персональнай выставкать панжемаса примась участия Мордовиянь Оцюнясь Артём Здунов. «Сюкпря Тонь трудолюбияцень и настойчивостцень инкса, эсь прянь аф ужяльдезь республикати покодемацень инкса, - мярьгсь регионтть руководителец. – Тя сембе масторонь классонь музейть эса Тонь оцю путфксце, се путф Тонь ваймоце. Тон вярьге лии нармонят – Тон покодят Мордовиянь народтть лангс, россиянь народтть лангс. Честь, шнама и модать видес поклон Тейть тянкса!»
Людмила Нарбековась сюконясь сембе кочкафненди поздравлениянкса и лямбе эмоциянкса: «Ули мяль эрямс, кожфтамс, покодемс и молемс инголи! Оцю сюкпря тядязень мархта алязенди, тонафтыненди, семьязти, сонь ётксонза и музееннетинге».
Панжемань церемонияда меле инжихне ванозь экспозициять, конанцты сувасть 50 лама живописень и графикань произведения, конат тифтольхть 1990-2020-е кизотнень. Шачем Масторти кельгомать и эряфть, верать и семьять, традициятнень колга мялямть ванфтоманц, личнайть и историческяйть преломлениянц колга мяльхне-арьсематне пяшкодезь Людмила Нарбековать творчестванц прявкс содержаниянц. Сонь эсонза сотневи эрь кодама народонь этническяй архаикати интерезсь и православнай одухотворенностьсь, тяряфнемат путомс карань-каршек духть кемешинц и тяниень пингть вишке шинц. Сонь творческяй масторонц спецификанц няфтьсы фольклорть и авангардть синтезсна, абстрактнайть и фигуративнайть марс пуроптомасна. Художникть вдохновениянь источниконза тя символикась и мокшэрзятнень, руснень, татархнень декоративна-прикладной искусстваснон образнай кяльсна.
Торжественнай открытиять пингста етась моднай щямонь коллекциянь дефиле, конац ульсь тиф Людмила Нарбековань руководстванц ала. Тяса сон пшкяткшни мокшэрзянь костюмть образнай ширенцты. Тяфта жа ульсть няфтьфт «Река времени» художественнай анимационнай фильмать фрагментонза. Картинась тиф художницать произведениянзон коряс «СОЮЗ ЭРЬЗЯ ФИЛЬМ. Межнациональное согласие» проектть потмоса – сон этафневи эряфс Президентскяй фондть культурнай инициативанзон кирдемаснон вельде.
Китькстасаськ, што Людмила Нарбековась 1985 кизоста сявомок –республиканскяй, региональнай, всероссийскяй, международнай выставкань участник. 30 лама персональнай мероприятия сон ётафтсь Россияса и омба масторса. Сонь произведениянза ванфтовихть С.Д. Эрьзянь лемса музейса, Пензенскяй картиннай галереяса, «Арт-Донбасс» художественнай музейса, Саровонь и Геленджиконь музейса. Людмила Николаевна панжезе тяфтама цебярь покодемань секретонц и прявкс эряфонь принципонц: мезевок аф кадондомс вандыень шити, улемс кода ули вий максф тевти тячи. «И, конешно жа, теень лезды монь аф кирневи оптимизмазе!» - азондозе Людмила Нарбековась.
Мордовия Республикань Оцюнять пресс-службац