Региональнай бизнес-омбудсментсь тись республикань руководительти эрь кизонь доклад эсь тевсонза сатфкснонь колга. Елена Юрченкова китькстазе: 2023 кизоня предпринимательхнень эзда сась 180 пеняцама и пшкядема – тя ламода сяда кржа ётай кизоннеть коряс. Омбудсментть мяленц коряс, тя кирьфтамась – республикаса властень сембе оргаттнень бизнесть мархта лац ладяф работань результатть сатоманц вельде.
Васедемаса ванозь инь сидеста макссеви кизефкснень, конань мархта предпринимательхне пшкятькшнихть Уполномоченнайти. Синь сотфт земельно-имущественнай соткснень, налогонь администрированиять, контрольно-надзорнай оргаттнень ширде проверяматнень мархта.
Докладса, конань аноклазе МР-са предпринимательхнень праваснон коряс Уполномоченнайсь, азф мяль примамс «О семейном предпринимательстве» Република Мордовиянь Законць, тиемс полаткст МР-нь трудовой династиять колга Положенияти, поладомок сонь «предприниматель» профессиять мархта.
Стане жа васедемаса ванфтольхть опросонь результаттне, конань ётафтозе 2023 кизоня предпринимательхнень праваснон араламаснон коряс РФ-нь Президентть видеса Уполномоченнайсь.
Мордовия Республикаса 64 % кизефтьф бизнесонь представительхне эрявикс прябалакс лувсазь кадровай кизефксть. Пцтай 70 % республикань предпринимательда тяниень пингть заняфт эсь бизнесснон касфтомаса-виияфтомаса и келептемаса.
Мордовиянь Оцюнясь тяшкстазе сяда тов соткснень эрявиксшиснон предпринимательскяй сообществатнень и властень оргаттнень ёткса, а стане жа республикаса бизнесть вятемаса цебярь условиянь тиемаса. Мордовияса мекольце колма кизотнень ламода кассь МСП-нь субъектонь и самозанятайхнень лувкссна.
Республика Мордовиянь Оцюнять пресс-службац