Лама функция мархта центрань семьянь Недялясь ушедсь 1 апрельста странань сембе субъектса иттненди лезксонь максома Фондть инициативанц коряс, конатнень стака эряфсна, и «Единая Россия» партиять лезксонц вельде. Эрявикс цельсь – пачфтемс эряйхненди тя площадкать эрявиксшинц колга. Республикаса Семейнай МФЦ-сь покоди «Надежда» приютть видеса. Недяляньберьф тяса кармайхть ётнема иттненди и синь тядяснонды-аляснонды лемтьф мероприятият. 1 апрельста ётасть «Прежде всего мы – родители!» и «Азбука семейного общения» лем ала тренинкне, 2 апрельста круглай шра ваксса ванфтольхть межведомственнай соткснень коряс кизефксне, штоба тиемс соткснень семьятнень мархта тёждякс и няевикс.
Недялять видеса мероприятиятнень шназень Артём Здунов. МР-нь общественнай лезксть коряс Штабонь площадкаса тонафтыхне-психолокне ётафтсть подросткатненди актуальнай тренинкт, а Семьянь МФЦ-нь покодихне - мастер-класст рисованиять коряс, тонафтсть оригами техникати и парикмахерскяй искусствати. МФЦ-нь семьянь Недялясь кармай молема 7 апрельть самс.
Стане жа Артём Здунов корхтась тренерхнень и спортсметтнень мархта, конат састь Белгородскя областьста. 32 легоатлет и колма тонафтыхть аф кунара састь минь республиказонк, конат сувасть приграничнай региононь 200 эряйхнень ёткс. Теест аноклаф экскурсионнай программа, синь содафтыхть ошть и республикать, сонь культурнай и спортивнай объектонзон мархта.
Мордовиянь Оцюнясь азозе, што минь региононьке спортивнай – тяниень пингонь инфраструктура мархта. Стане жа республикась содаф эсь образованиянь системанц мархта – аноклай специалистт эрь кодама направления коряс, кондястихне промышленности, ащи странань региононь топса олимпиаднай мольфтеманц, школьнай анокламать уровененц коряс.
«Шарфтода мяль вузоньконь лангс, пингсь моли вишкста – курок эряви поступамс. Тяконц мархта эряви улемс ялга спортти – тянкса минь цебярьхть условияньке. Минь кельгсаськ культурать – республикаса лац молихть тевсна театратнень, синь лама гастрольдост. Ошсь цебярь, республикась сетьме и мазы, - мярьгсь Артём Здунов. – Минь кенярттяма теенть! Тейнек пара, мес ётни пефтома полафтомат, а тянь мархта, марса минь кастама. Тинь фалу надияда минь дуганонь лафтувоньконь лангс».
Тренерсь-тонафтысь Валентина Долгополова азозе, што делегациять
васьфтезь пяк лац, вастонь максомань и тренировкань условиятне пяк цебярьхть. «Минь тяса павазуфтама, повоме афкуксонь ёфксс! Марясаськ, што минь аф ськамонк, а тянкса, сяськомась ули мельганк», - азозе тонафтысь.
Спортсменкась Юлия пачфтсь, што вете кизот заняф тёждя атлетикаса и сюконясь лац васьфтеманкса. Тонафнема-тренировочнай кочкаматнень видеса, конат ётнихть Мордовияса, сон арьси цебярьгофтомс эсь сатфксонзон и спортивнай разрядонц. «Эсь профессиязень ёран сотомс спортть мархта. Саранскяйса минь лац аноклатама, кастама. Улеме экскурсияса – ётась пяк мялень салайста», - тяшкстазе Юлия.
Артём Здунов макссь эрявикс совет – ладямс соткст ломаттнень мархта, синь лувкссост и Мордовияста – синь эрявкстыхть эряфса. Сон стане жа азсь мяль тонафнема вастокс кочкамс республикань вуснень эзда фкять.
«Сюкпря возможностть инкса тренировандамс тяфтама цебярь условияса, - азозе областной пялькстоматнень коряс призёрсь Захар. - Ся шиста, мзярс минь тясотама, мон содань лама одта республикать, сон столицанц колга. Лувса, што эряви содамс ялга нароттнень историяснон».
Тренерсь-тонафтысь Игорь Савчук сюконясь Белгородскяй областень губернаторти и Мордовиянь Оцюняти тя поездкать, цебярь тренировочнай условиянь анокламать инкса. Сон азозе, што Белгородскяй областьса ётафневи Яковлевскяй марафонць Курскяй битвань геройхнень лемс, и тердезе Артём Здуновонь примамс участия сяда тов пялькстомаса: «Учтядязь инжикс!»
Васедемать песта Артём Здунов явсь инжихненди мяляфтови казнет. «Карматама ялгат, карматама лездома и фкя-фкянь кирдема аф тёждя пинкнень», - азозе сон.
Республика Мордовиянь Оцюнять пресс-службац