Корхтафоль моноошнень мархта ситуациять колга, ширень кирдемань мератнень квалма, конатнень ВЭБ.РФ-сь азонкшнесыне од инвестиционнай проекттнень эряфс ётафтоманкса.
Лятфтасаськ, Мордовияса кота моноошт – Рузаевкась, Кадошкинась, Комсомольскяйсь, Атяшевась, Тургеневась, Умётсь. Кафта проекттнень получазь ни Фондть ширень кирдеманц – тя Рузаевка ошса «Рузово» предприятиясь и Кадошкина посёлкаса «Мир цветов ТК»-сь.
Васедемать пингста корхтафоль Рузаевкаса нинге фкя проектть эряфс ётафтоманц – катонди и пиненди коське и начка кормань производствать коряс заводть строямац. Пяшксе мощностьс лисемда меле производствать кизоньберьфонь объёмоц арай 100 тёжянь тонна кормань эрь видта. «Талина» компаниянь группась арьсекшни нолдамс строительствати 10 миллиардта лама цалковай. Проектть эряфс ётафтоманц вельде республикаса панжеви 600 од покодема васта.