15 апрельста Мордовиянь Оцюнять аф лама пингс тевонзон тиендисна видеоконференцсвязень режимса примась участия Государственнай Советть президиумонц и «Агентство стратегических инициатив по продвижению новых проектов» АНО-ть марстонь заседаниясост. Заседаниять вятезе Российскяй Федерациянь Президентсь Владимир Путин. Доклаттненди темакс арась образованияса, медицинаса, социальнай защитаса и трудоустройстваса государственнай услугатнень доступностьснон касфнемац и качестваснон цебярьгофнемац. Тянкса тевс нолдаф федеральнай и региональнай уровенень мератне аноклафт Национальнай социальнай инициативать рамкаса, кона етафтови эряфс АСИ-ть мархта государствань оцюнять поручениянц коряс.
Владимир Путин китькстазе, што тя общественно значимай проектть смузец тоса, штоба цебярьгофтомс Россиянь эрь гражданинть эряфонц социальнай сферанц. Ответственнай чиновникнень инголе путф задача тиемс соцсферать работанц сяда ломаненнекс и ладямс сембе процесснень, сявондемок мяльс эряйхнень вешфксснон. Тяка пингть РФ-нь Президентсь азозе: «Ломаттнень аф пичефтьсазь техническяй, административнай, организационнай кизефксне. Теест важна получамс лезксть цебярь качестваса и эсь пингстонза, штоба тя пингть специалисттне, конат макссесазь тя лезксть, синць афольхть васетькшне сталма мархта, - вов мезе тейнек эряви тиемс. Кепотьксонди, штоба врачне, образованиянь, социальнай службань работникне вельф лама пинге афольхть занце пря каготтнень мархта, а шарфнельхть сяда оцю мяль ломаттненди, васендакиге.
Президентсь макссь поручения сяда лама полафнемс опытса, ладямс марстонь работа региональнай командатнень еткса, пуропнемс марс инь цебярь практикатнень и марса Агентствать мархта лезнемс региоттненди сувафнемс тевс эффективнай решеният образованиянь, здравоохранениянь, социальнай обслуживаниянь учреждениятнень и занятостень центратнень работас.
Государствань оцюнясь китькстазе, што социальнай инициативась должен арамс инь важнай инструментокс касондомань-вииякшнемань национальнай цельхнень сатоманкса. Главнайсь еткстост тоса, штоба ломаттне эряльхть сяда цебярьста оцю ошнень, емла велетнень эса, странать марнек территориясонза.
Госсоветонь президиумть заседаниянц шумордамда меле Артём Здунов мольфтсь корхтама правительствань социальнай блокть представителензон мархта кепотьф кизефкснень колга. «Тейнек эряви сяда лац тонафнемс эряфонь ся ситуациятнень, конатнень колга корхтась Президентсь, и конатненди повондыхть граждаттне, пшкятькшнемок государственнай услуганкса здравоохранениянь, образованиянь, соцзащитань сфераса», - мярьгсь республикань вятись.
Примаф решения маластонь пингть тонафнемс соцсфераса услугань максомань тевть цебярьгофнеманц коряс сембе уликс региональнай практикатнень. Артём Здунов шарфтсь мяль сянди. што эряви тонафнемс республикань рядовой эряйхнень эряфонь ситуацияснон, конат васетькшнихть госуслугатнень получамаснон коряс сталма мархта, и, тянь мяльс сявондезь азомс предложеният синь доступностьснон обеспечендаманц коряс.
Лятфтасаськ, Национальнай социальнай инициативась етафтови эряфс АСИ-ть мархта Россиянь Президентть Владимир Путинонь поручениянц коряс. НСИ-сь – тя граждаттнень эряфснон цебярьгофнеманц коряс федеральнай и региональнай мерат. 2020 кизоня НСИ-ть механизманза сувафтфтольхть тевс Новгородскяй, Нижегородскяй, Кемеровскяй, Калининградскяй, Сахалинскяй областтнень эса и Башкирияса. 2021 кизоня НСИ-сь должен улемс сувафтф тевс марнек странать эзга.
Мордовия Республикань Оцюнять пресс-службац