17 сентябрьста Саранскяйса, Культурань республиканскяй Дворецса ётафтовсь таколфты и гордостень эвондафты ила. Тяса максфоль «Геройхнень пингсна» Народнай омбоце премиясь. Сонь получазь Мордовиянь простой ломаттне, конатнень марнек эряфсна, кода фкя оцю подвиг, сят, кинь эзда ули кода тонафнемс аф нолямс кяттнень стакатнень-сталмотнень инголе, верондамс цебярьс и эсь вийхненди. Казьфнень ётксольхть врачт, учительхть, военнайхть, спортсметт, велень хозяйствань труженикт, социальнай работникт и лият. Илась няфтезе: геройхне ётксонк. Синь работайхть вакссонк, седикс-ваймокс тиендьсазь эсь тевснон, верондайхть видешити и справедливостти, аф молихть совестьснон каршес и тякоти тонафнесазь идьснон.
Кода азозе пуромфнень приветствовандамста Мордовиянь Оцюнясь Артём Здунов, тядде геройхнень кочкаманкса вайгялень максомаса примась участия пцтай 200 тёжянь ломань. Сембоц ульсь 1000 номинант, кочкаф 25 сяськи.
—Эрь ломанть ули сонцень героец—тя минь тядяньке-аляньке, ялганьке, кие минь аралакшнесамазь, кинди минь верондатама,—мярьгсь сон.—Тячи тя залсот монь учительне, мялезе спасибамс теест, синь монь геройне, сяс мес 90-це кизотнень лядсть эсь позицияснон лангса, тонафтсть-воспитандасть лама цебярь ломань. Лувондса, што тя геройства—аф тумс эсь фронтцень, эсь участкацень лангста нльне инь стака пингста. Эрьда карматама маряма гордость эсь тевоньконь инкса».
Каземань церемониять ушедомда инголе Артём Здунов макссь государственнай наградат. Российскяй Федерациянь Президентть Указонц мархта мужестванкса и отваганкса, конат няфтьфтольхть воинскяй долгть пяшкодемста, куломдонза меле Мужествань орденца казьф Большеберезниковскяй райононь Сире Найманы велеса шачфсь-касфсь Василий Королев. Орденць максфоль геройть тядянцты и рьванцты.
Российскяй Федерациянь Президентть Указонц мархта отваганкса и эсь прянь аф ужяльдеманкса, мезсь няфтьфоль боевой условияса боевой задачатнень пяшкодемста, «За отвагу» медальса казьф Максим Абросимов. Сон шачсь-кассь Большеигнатовскяй райононь Ташто Кшуманца велеса, шавовсь воинскяй долгонц пяшкодемста. «За отвагу» медальса Максим казьфоль нинге шиса улемстонза, но сонь ашесть кенере максомс теенза. Илать пингста медальсь максфоль тядянцты.
«Тя пингонь герой» специальнай премияса казьфтольхть специальнай военнай операциянь участникне Алексей Конов, Иван Волков, Миразым Исмаилов, а стане жа врачсь Кирилл Лёвкин.
Сяда тов сценать лангс лисендсть эрь-кодама номинацияса «Геройхнень пингсна» премиять получаенза.
«Призванияс коре геройхть» номинацияса сяськсь мокшень стирсь Людмила Кирдяшова—пожарно-спасательнай спортть коряс миронь 12-крдань чемпионкась и спортонь тя видть коряс Россиянь сборнайть капитаноц, пожарнайхнень и полицейскяйхнень ёткса Европейскяй и Мировой налхкомань ламонь-крдань сяськись.
«Воспитаниянь геройхть» номинацияса сяськсь Дмитрий Глебочкин—2№ идень творчествань центрань дополнительнай образованиянь педагогсь, кона ётафтсь 20-да лама спортивнай маршрут, тяконь лувксса Тянь-Шаню, Уралу, Алтаи, Центральнай Кавказу высшай категориянь маршруттнень, воспитандась учениконь несколька поколения, конат тячи работайхть учителькс, тренеркс, МЧС-нь сотрудникокс.
Правопорядкань геройкс арась Виталий Баранов, 2020 кизонь сентябрьста пожарть пингста сон аралазе инвалидность мархта алять.
«Добровольчествань геройхть» номинацияса сяськсь Ромодановскяй районцта Галина Созаева—Захар Прилепинонь фондста волонтёрсь. Кафта кофт сон работась Луганскяй народнай республикаса.
«Семьянь геройхть» номинацияса сяськсть Сире Шайгав велеста мирттне-рьвятне Александр и Ольга Котькиттне. Синь касфтыхть ниле шабат.
Социальнай работань геройкс арась Сире Шайгавста Елена Малыженкова.
«Седить тердеманц коряс геройхть» номинацияса сяськсь Владимир Захарин. 2021 кизонь августста сон аралась ваямада ломань Атяшевскяй районца.
Медицинань геройкс кочкаф Идень республиканскяй клиническяй больницянь анестезиологсь-реаниматологсь Александр Чарышкин.
«Преодолениянь геройхть» номинацияса сяськсь Даяна Паршакова. Темниковскяй кудонь-интернатонь ингольдень воспитанницась, тяни М.Е.Евсевьевонь лемса МГПУ-нь филологическяй факультетонь студенткась шачсь инвалидкс, сембе эряфонц ётафтозе инвалидонь коляскаса, но тя аф шоряй теенза тонафнемс и кеняртькшнемс эряфти. А нинге сон пяк лац сёрмады стихт.
Образованиянь геройкс арась Ковылкина ошень 3№ средняй общеобразовательнай школань рузонь кялень и литературань учительсь, мокшавась Галина Алямкина. Сон сувси педагогонь династияти, конань марстонь стажец 1000-да лама киза!
«Наукань геройхть» номинацияса сяськикс кочкаф Лариса Балыкова—Н.П.Огарёвонь лемса МГУ-нь медицинскяй институтть директороц.
Производствань геройкс арась Светлана Тараканова—«ВКМ-СТАЛЬ» заводонь мостовой кранонь машинистсь.
«Спортонь геройхть» номинацияса сяськсь Руслан Бичурин—Алексей Мишинонь лемса спортивнай бороцямать и дзюдоть коряс олимпийскяй резервань спортивнай школань борецсь, греко-римскяй бароцямать и каркс лангса бароцямать коряс Россиянь спортонь мастерсь, 2022 кизонь инь вии спортсметтнень спартакиадаснон чемпионоц.
Культурань геройкс арась Мордовскяй государственнай филармониянь солистсь Андрей Бочканов.
«Экологиянь геройхть» номинацияса сяськсь Ольга Ручина, «Зелёный мир» идень экологическяй организациять руководителец.
Велень геройкс кочкаф Павел Шершаков—«Ресурс» агропромышленнай комплексть руководителец и блогерсь.
«Меценатствань геройхть» номинацияса сяськсь Владимир Кабаев—фермерсь-благотворительсь. Сон максси материальнай лезкс шумбрашинь ограниченнай возможность мархта ломаттненди, ашу семьятненди, СВО-нь участникненди.
Мялямонь ванфтомань геройкс арась Игорь Лошкарёв. 20 кизода тяда инголе сон пуроптозе «Владычный полк» историческяй реконструкциянь и средневековой фехтованиянь клубть.
«Геройхнень пингсна» Народнай омбоце премиянь максомань церемонияс тертьфоль аф кржа инжи лия региоттнень эзда. Нят стане жа ломатть, конатненди вийс коре тиендемс героень тефт. Тя, кепотьксонди, Пермьста начальнай классонь учительсь Наталья Шагулина. 2018 кизонь 15 январьста старшай классонь кафта ученикне пеель мархта сувасть классу, коса Наталья Васильевна вятсь урок 4 класса тонафнихненди. Учительницась кемзисемгоксть сялкфоль пеельса, но сон мусь эсь эсонза вийхть лихтемс шабатнень класста. Или Татарстанцта пианистсь Алексей Романов. 23 кизоса цёрась шачсь кядьлапафтома, но тя ашезь ара теенза перяфксокс идькс пингонь мяленц пяшкодеманкса—тонадомс музыкальнай инструментса морсема. Тя и Россиянь Заслуженнай артистсь Николай Носков, кона кирдсь стакадонга стака инсульт, лиссь Саранскяень сценать лангс инвалиднай коляскаса, но ваныхнень инкса тись эзганза несколька аськолкс и живой вайгяльса морась концертоньберьф. Ня ломаттне, конатнень эзда эряви тонафнемс и сявондемс пример!