Лятфтасаськ, што республикаса тевс сувафтф базовай анокшинь режим, но обстановкась веши работань сембе участкатнень эса оцю ответственность. Республикань Оцюнясь макссь поручения шарфтомс башка оцю мяль ЧС-тнень эзда араламать коряс профилактическяй мероприятиятненди, гражданскяй оборонань араламань сооружениятнень анокшиснонды, безопасностень мератнень виияфнемаснон лангс лама ломанень пуропни ся объекттнень эса, конат пяк важнайхть и коса ули зиянонь эвондамань пелькс.
Стане жа оперштабть заседанияса корхтафоль республикаса материальнай средствань, конат эрявихть военнослужащаеньконди, производствань ладямать колга. Артём Здунов лятфтазе, што 25 октябрьста РФ-нь Правительствать Председателец Михаил Мишустин лиссь государствань оцюняти индивидуальнай араламань специальнай средствань нолямать касфнеманц колга инициатива мархта. «Минь республикаса тяниень пингть заняфтама тянь мархта, ушеткшнемок спальнай кяскавонь, лямбе щамонь производствать эзда сявомок бронежилетонь нолямати молемс, - мярьгсь Артём Здунов. - Мон китькснеса: сембось должен улемс ладяф промышленнай уровеньца — тянь инкса отвечайхть вице-премьерсь Игорь Фрейдин и республикань Промышленностень и наукань и од технологиянь министерствась».
Мордовия Республикань Оцюнять пресс-службац