Артём Здунов лемдезе лисьф трагедиять чудовищнайкс. «Жертвакс террористтнень аф ломанень врьгятемаснон эзда арасть кемотть мирнай эряйхть, аф аньцек Москувонь и Московскяй областень – ётксост и минь земляконьке. Мордовиясь седиге ризнай сембе странать мархта. Минь сембе шарьхкодеськ террористтнень принципфтома тевонь вятемаснон. Следствиясь азсы, кие кошардозень тя тевть тиемс. Но ся, што синь ётазь сембе границатнень, ломанень и аф ломанень, тя виде. Минь задачаньке – примамс сембе мератнень марстонь безопаснайшить тиеманцты».
Тяконь мархта, кода китькстазе Мордовиянь Оцюнясь, эряви лац-ряц ваномс объекттнень лафча вастснон аф аньцек критическяй инфраструктурать, но и лама ломань мархта васттнень.
Безопаснайшить тиеманц коряс кизефкснень общественнай мероприятиянь ётафтомста пачфтсть МР-ть коряс МВД-нь, Росгвардиянь, МР-ть коряс Россиянь МЧС-нь представительхне, стане жа республиканскяй министерстватне.
Республикань Оцюнясь макссь конкретнай порученият вельф максф мерань примамати, конат кучфт лама ломань мархта объекттнень безопаснайшинь тиемаснонды. Арьсеф ётафтомс марса араламань службатнень мархта объекттнень эса экстреннай условиятнень пингста действиятнень коряс тренировкат.
Мордовия Республикань Оцюнять пресс-службац