26 апрельста МР-нь Оцюнять аф лама пингс тевонзон тиендисна Артём Здунов ванозе Зубово-Полянаса культурань кудть, коса маластонь пингть ушедови капитальнай ремонт, а стане жа сай пингонь идень садть строительнай площадканц.
Культурань кудсь строяфоль 1986 кизоня, тяни тяса эряви тиемс капитальнай ремонт. Тянкса сави карьхцямс пцтай 114 миллион цалковай. Капремонтсь тиеви уликс государственнай программатнень еткста фкять рамкаса. Тиеви фасадсь, полафтови вельхкссь и куцеманятне. Стане жа путовихть од вальмат и кенкшень блокт, педа-пес полафтовихть инженернай сетьтне. Ремонтсь заняй кемонь кофт. Сянь колга, што райцентрань эряйхне пяк учендыхть культурань кудть петеманц эса, Мордовиянь Оцюнять аф лама пингс тевонзон тиендиснон мархта васедемать пингста азондсь «Время и жизнь» районнай газетать главнай редактороц Людмила Цыплякова. Артём Здунов надияфтсь эняльдемать пяшкодемс.
«Китнень районца петнесаськ, производстват тевс нолятама, а мезе культурась – юкстафста ляды?» - мярьгсь сон прябалать содамдонза меле. И азсь мяль шоворемс прябалать решандаманцты Юлия Оглоблинати – велень од ломанень Российскяй союзть председателенцты, кона ульсь васедемаса.
Стане жа региононь вятись ванозе 90 вастонди сай пингонь идень садть строительнай площадканц. Строямась мольфтеви «Демография» национальнай проектть коряс. Проектть питнец 107 миллион цалковай, средстватнень 96 процентсна нолдафт федеральнай бюджетста. Шумордафт анокламань работатне, мольфтеви фундаментть ладямац. Сувафтомс объектть тевс арьсекшневи декабрьста.
Артём Здунов тага весть лятфтазе, што васендакиге мяль шарфнема тястоконь подрядчикненди, а строительнай материалхнень эзда кода можна сяда ламось должен улемс рамаф республиканскяй производительхнень кядьста.
Мордовия Республикань Оцюнять пресс-службац