5 апрельста Мордовиянь Оцюнять аф лама пингс тевонзон тиендисна Артём Здунов етафтсь рабочай васедема оцю технологияса предпринимательхнень мархта. Мобильнай операторхне, оцю IT-компаниянь вятихне и профильнай министрхне корхтасть региональнай отрасляса уликс прябалатнень и сяда товолдонь касондомать-вииякшнемать колга.
Артём Здунов лятфтазе, што мольфтеви оцю работа республикать социально-экономическяй виияфнеманкса стратегиять анокламанц коряс, и информационнай технологиятнень виияфнемасна – флагманонзон еткста фкясь. «Тя сфераса лама рабочай вастта. IT-индустрияти вийс коре лездомс мрдафтомс ламоц высококласснай специалисттнень емла родиназост, но кда республикаса кармайхть тянкса условият. Минь, кода правительства, должеттама шарьхкотькшнемс, кодама цебярь условият тиендемат теенть», - мярьгсь региононь вятись.
Сотовай операторхне азозь, што связть качестванц цебярьгофнеманкса и даннайхнень сяда курокста пачфнеманкса теест эрявихть строямс од станцият. Улихть сталмот теест вастонь кочкамаса: кой-коста оборудованиять сашендови латцемс гаражнай массифнень эса и эряма куттнень пряса. Артём Здунов макссь поручения пуроптомс рабочай группа и республикань Минстройть и Минсвязть участияснон пингста решандамс тя прябалать.
IT-индустриять кадровай обеспечениянц мархта сотф кизефксть кеподезе «Байтекс» компаниять вятиец Дмитрий Карасев. Сон азозе, што тя сферань 6 инь оцю компаниятне анокт эрь кизоня примсемс работама 300 молемс квалифицированнай сотрудник и тя вешфкссь най касонды. Средняй и высшай учебнай заведениятнень эса программатне аф кенерькшнихть вииякшни отрослять мельге. Решандамс тя прябалать ули кода WorldSkills движениять мархта партнерствать вельде, конань рамкаса можна анокламс нюрьхкяня, но курокста шарьхкодеви спецкурсат. Стане жа ули рабочай пространстватнень мархта сотф прябала: компаниятненди эрявихть тяниень пингонь офист, коса ули вентиляциянь, энергосбережениянь системат, интернет-соединения – тяфтамода аф лама и питнесна пяк оцю.
МР-нь экономикань, торговлянь и предпринимательствань министрть тевонзон тиендиснонды Алексей Грибановонди максф поручения тонафнемс-ваномс лия региоттнень эса IT-сферати государственнай лезксонь максомань практикать и анокламс конкретнай программа.
Артём Здунов макссь поручения лац-ряц ваномс сембе предложениятнень, конат азфтольхть васедемать пингста. Тяда башка, Мордовиянь Оцюнять аф лама пингс тевонзон тиендисна надияфтсь, што тяфтама васедематне кармайхть етафневома фалу.
Мордовия Республикань Оцюнять пресс-службац