«Монь, васендакиге, мялезе содамс, кода полафнихть питнетне продовольственнай товархненди и стройматериалхненди. Тячи стане жа карматама корхтама населениять занятостенц колга и сянь, кода работайхть минь предприятияньке», - мярьгсь республикань руководительсь.
МР-нь экономикань, торговлянь и предпринимательствань министрть заместителец Александр Анохин пачфтезе, што регионца фалу мольфтеви розничнай питнетнень мониторингсна. Потребительскяй рынкаса товархненди розничнай вешфкссь мрдась нормати, аш дефицит. Товарнай запасне республикаса сатыхть 30 шиста сявомок 100 шис молемс – оптовай звенаса – 8 шиста сявомок 65 шис молемс – розничнайса. Продовольствияти питнетнень кирьфтаманкса сяда тов ётафневихть ярмаркатне, кизоть ушедомста республикань сембе райоттнень эса эздост ётафтфоль 2296.
Мордовиянь велень хозяйствань и продовольствиянь министрсь Александр Кечайкин азозе, кода мольфтеви велень хозяйствань предприятиятнень субсидированиясна. Апрельста нолдафоль 655 миллион цалковай субсидия, кизоть ушедомста – 950 миллион. Стане жа мольфтеви льготнай кредитованиять коряс работа, получаф 6,6 миллиартта лама цалковай льготнай кредит 5 процент алу кизоти.
Регионца мольфтеви тундань видемань кампаниясь – зерновойхне и зерно-бобовайхне видевихть 140 тёжянь гектарса, 52 процентсь пяшкотьф ни.
Мордовиянь строительствань и архитектурань министрсь Алексей Гришакин пачфтсь строительнай отрасляса ситуациять, строительнай материалхненди питнетнень колга. 1 майста сявомок кирьфтавсть ипотечнай кредиттнень коряс ставкатне 12 процентста 9 процентс, стане жа кредитть инь оцю лувксоц касфтф 15 миллион цалковайс. Ушедсь работама кизоти вете процент алу льготнай ипотекась IT-специалисттненди. Отраслянь специалисттнень эзда ушедсть ни сашендома заявкат.
МР-нь социальнай защитань, трудонь и населениять занятостенц коряс министрсь Игорь Князьков азондсь сянь колга, кода ётафневихть эряфс населениять занятостенц сфераса гослезксонь мератне. Регионца 945 работниксь трудендайхть аф лама пингонь рабочай вастса, арьсекшневи панжемс нинге 256 тяфтама рабочай васта. Тяда башка, мольфтеви 130 ломанть тонафнемасна, работань максыхнень мархта тиф заявка нинге 87 ломанть профтонафнеманкса.
«Официальнайста регистрировандаф безработнайда тяниень пингть пцтай кафтонь-крда сяда кржа кизода тяда ингольдень пингть коряс. Вакансиянь базаса, конатнень азозь республикань предприятиятне, - 7 тёжятть рабочай васта», - мярьгсь ведомствань руководительсь.
Заседаниять шумордамста Мордовиянь Оцюнясь китькстазе, што республикань сембе отраслевой министерстватненди эряви оперативнайста ваномс гослезксонь од мератнень тевс сувафнемаснон мельге, участвондакшнемс сембе федеральнай программатнень эса.
Мордовия Республикань Оцюнять пресс-службац