Тя сферать покодиензон поздравляндазень Мордовиянь Оцюнясь Артём Здунов. Сон китькстазе: мекольце кизотнень республикань жилищно-коммунальнай хозяйствать эса появасть цебярь полафкст. «Минь участвовандатама сембе жилищнай фондонь модернизациянь, инженернай инфраструктурань объекттнень, вастонь мазоптомань коряс программатнень эса. Эряви азомс, инголе лама сяськома, коса минь приматама участия. Мон мярьган правительствати занямс тяса эряз позиция, - мярьгсь Артем Здунов. - Аньцек ётай кизонь итогнень коряс нят цельхнень эряфс ётафтомаснонды ульсь муф и максф 3 млрд. цалковай».
Мордовиянь Оцюнясь китькстазе «Чистая вода» программать. «Сон топафты лама кизонь водоснабжениянь прябалатнень, синь эздост лама. Тейнек сави ётафтомс Саранскяень сетень модернизациять, минь крхкаста ванодсаськ тя кизефксть, саворне карматама сафнема семботь порядкас. Ётай кизоть минь тиеме Ковылкина ошса водозаборть реконструкциянц, Кемляса путоме водоснабжениянь сетть, водоочистной станция Ардатовса. Чамзинкаса и Лямбирьса топафтоськ кизексть. Тя кизоть эряви тиемс педа пес Краснослободскяйса водоснабжениять и молемс сяда тов», - мярьгсь Артём Здунов.
Эряви и цебярь ошень средань тиевомань программась. Ётай кизоть ульсь цебярьгафтф 19 кудпирьф и 9 общественнай пространства. 2030 кизоти путф задача цебярьгафтомс эрь кудпирьфсь, штоба сембе эрямань пунктнень эса улельхть общественнай пространстват, коса ули кода ваймамс, шаромс-велямс.
Ётай кизоть республикаса ульсть ётафтфт эряфс кафта оцю Саранскяень теплоснабжениянь модернизациять коряс проектт марстонь питнеса 600 миллион цалковайда лама.
Сюконямок территориянь касфтомань-виияфтомань фондтть кирдеманцты Саранскяйса кармай тиф 3,5 км канализационнай сеть и коллекторть одкстоптомац.
Тяфта жа тя кизоть кармай тиф 237 ламаквартира мархта кудса педа пес ремонт 800 млн. цалковай лангс.
ЖКХ-нь и населениянь бытовой обслуживаниянь покодихнень тяфта жа поздравляндазь Мордовиянь Госсобраниянь Председательсь Владимир Чибиркин, республикань Правительствать Председателец Дмитрий Поздняков, РМ-нь ЖКХ-нь и энергетикань министрсь Александр Голянин.
Иласа ульсть максфт государственнай и ведомственнай казнет.
«Сюконян Артем Алексеевич Здуновоньди казнянкса, - мярьгсь Ардатовскяй райононь МП «Тургеневожилкомхоз»-ть жилищно-эксплуатационнай участкать начальникоц Татьяна Камушкина. - ЖКХ-нь системать эса мон покодян 30 кизода лама. Эрявикссь минь тевсонок – улемс панжадокс ломанень эняльдематненди, казендемс теест лямбе ши, эсь пингстонза урядцемс сембе синнефксне, штоба кивок афоль кирде кяж. Монь пяк пара мялезон, што покодемазень китькстазь, сюкпря!»
Мордовия Республикань Оцюнять пресс-службац